Manatın taleyi ilə bağlı
“Ölkə.Az” xəbər verir ki, səbəb isə sabah şənbə günü olmasına baxmayaraq bir sıra banklara iş başında olmaları göstərişidir. Bu qərar cəmiyyətdə birmənalı qarşılanmayıb. Sosial şəbəkələrdə sabah yenidən devalvasiya olacağı barədə fikirlər yazılıb.
Ekspertlər də manatın gələcək taleyi ilə bağlı hansısa proqnoz söyləməkdən çəkinirlər. İqtisadçı ekspert Vüqar Bayramov da bu barədə qabaqcadan nəsə deməyə çətinlik çəkdiyini bildirib. Onun sözlərinə görə, makro-iqtisadi göstəricilərə və eləcə də tədiyyə balansındakı saldoya əsaslansaq yeni potensial devalvasiya səbəbi izah edilən deyil.
“Məzənnə ilə bağlı rəsmi qərarı Mərkəzi Bank qəbul etdiyi üçün sabah və ya başqa hər hansı gün devalvasiyanın olub-olmayacağını söyləmək çətindir. Hətta valyuta bazarındakı indiki mövcud tənzimləmə ilə bunu proqnozlaşdırmaq heç mümkün də deyil. Proqnozlaşdırıla bilən xarici valuyataya tələbin necə deyişməsidir. Biz avqust ayında dollara tələbin artacağını öncədən proqnozlaşdırırdıq. Bu da baş verdi. Dövlət Neft Fondu iyulda hərraclarda 253,2 milyon manat satmışdısa, avqustda 292,6 milyon manat xərclədi. Bu isə o deməkdir ki, dollara tələb avqustda iyula nisbətən 15 faizdən çox yüksəlib. İlin sonuna doğru dollara tələbin artacağı gözləniləndir. Bunun məzənnəyə necə təsir edəcəyi isə yenə də birbaşa Mərkəzi Bankın səlahiyyətində olaraq qalmaqdadır”, - deyə V.Bayramov bildirib.
Məsələ ilə əlaqədar Mərkəzi Bankdan da rəsmi açıqlama verilib. Qurumdan bildirilib ki, sabah ölkədaxili hesablaşma-kassa əməliyyatlarının aparılması məqsədilə kommersiya banklarına işləməklə bağlı göstəriş verilib:
“III rübün başa çatması ilə əlaqədar olaraq dövlət büdcəsinə daxilolmaların kütləviliyini, xərclərin aparılmasının rəvanlığını və hesablaşmaların başa çatdırılmasının təmin edilməsi zəruriliyini nəzərə alaraq, ölkədaxili hesablaşma-kassa əməliyyatlarının aparılması məqsədilə 30.09.2017-ci il tarixi bank sistemi üçün rəsmi iş günü elan olunub. Bununla bağlı kommersiya banklarına rəsmi bildiriş göndərilib.
Ziya Səccad
Ölkə.Az
