Kürd dövlətinin qurulması ABŞ-ın uzunmüddətli planıdır

“İraq ordusu çox zəif və parçalanmış ölkənin ordusudur. Əvvəlki kimi Səddam Hüseynin ordusu deyil. Onların hazırkı ordusu Xalq Cəbhəsinin dövründə Azərbaycanın ordusuna bənzəyir. Başı pozuq hökumətin ordusu nə ola bilər? Əsas məsələ odur ki, mərkəz pozulub”.

Bu barədə politoloq İlqar Altay “Ölkə.Az”a açıqlamasında bildirib. Onun sözlərinə görə, İraqda nə qədər İŞİD terrorçusu öldürülür, orada nə baş verirsə, Amerikanın dəstəyi hesabına baş verir.

“Avropanın dəstəyi və Amerikanın gücü hesabına İraq ordusu terrorçulara müqavimət göstərir. İraq ordusuna qalsaydı, İŞİD terrorçuları oranı tam tutmuşdular”, - deyə siyasətçi bildirib.

İraq ordusunun kürdlər üzərində qələbə çala bilməsinə gəlincə, İ.Altay bunun mümkünsüzlüyünü düşünür:

“İraq ordusunun İŞİD üzərindəki bu qələbəsini Şimali İraq Kürd Muxtariyyətinə qarşı tətbiq edəcəyini düşünmək əsassız olar. Çünki kürdlər üçün orada dövltə qurmağa şərait yaradıldı. ABŞ-ın kürd yaraqlılarını İŞİD terrorçularına qarşı mübarizəyə hazırlayanda bu proses başlamışdı. Yəni Amerika hərbçiləri kürd yaraqlılarını bir növ terrorçular üzərində hərbi təlimlərə hazırlayırdılar. Həmin kürd qüvvələri uzun müddət məşqlər etdilər, ağır sınaqlardan keçdilər. Amerika terrorçularla mübarizə adı altında kürdlərə çoxlu hərbi texnikalar verdi. Bütün bu proseslər kürdlərin müstəqilliyi üçün hazırlanırdı. İndi kürdlərin İraq ordusu ilə mübarizə aparmağa kifayət qədər güclü döyüşçüləri və hərbi texnikaları var”.

Ziya Səccad
Ölkə.Az