"Bizim erməni versiyamızda 75 yaşlı əməkdaş da var"

Bu gün Azvision.az saytının 5 yaşı tamam olur. Saytın baş redaktoru Vüsal Məmmədov yubiley günündə "Ölkə.Az"-ın suallarını cavablandırıb.

- Vüsal bəy, bu gün hər kəs Azvision.az-ın 5 yaşını təbrik edir. Deyə bilərikmi, bu gün Azvision-un "kiçik toyudur"? Çünki adətən oğlanların bu yaşlarda kiçik toyları olur...

- Maraqlı bənzətmə oldu... Amma bu 5 ildə o qədər kişi söhbətlərindən, çəkişmələrdən keçmişik ki, təzədən durub kiçik toya qayıtmaq düz çıxmaz... Gəlin, belə deyək ki, bu gün AzVision keçdiyi yola görə “5” alır .

- İstənilən xəbər portalının, saytın fəaliyyətə başlayarkən hədəfləri olur. Azvision.az 5 ilə qarşıya qoyduğu məqsədin neçə faizinə nail ola bildi?

- Yeni başlayarkən qarşıya qoyduğumuz hədəfləri çoxdan keçmişik. Özü də bir neçə dəfə. İlk məqsəd ölkənin xəbər məkanında ciddi jurnalistika ilə yerini tutmaq və sözünü demək idi. İki-üç ildən sonra həmin hədəfə çatmışdıq. Bu gün erməni dili də daxil olmaqla, 7 xarici dildə ölkənin maraqlarına uyğun xəbər siyasəti yürüdürük. Ötən ay dostlar mənə bildirəndə ki, senator, ABŞ prezidentliyinə keçmiş namizəd Con Makkeyn rəsmi Tvitter hesabında AzVisionun xəbərini paylaşıb, artıq səsimizin hara qədər gedib çıxdığını təxmin etdim.

- Kollektivinizdə gənclər üstünlük təşkil edir. Təcrübəli imzalarla işləmək çətinlik yaradır, yoxsa bu, sırf təsadüfdür?

- Təcrübəli imzalarla sıx əməkdaşlığımız olub, var və hələ çox olacaq. Xüsusilə Füzuli Sabiroğlu, Müsəllim Həsənov, Bəhram Çələbi kimi tanınmış imzaları qeyd etmək istərdim. Amma sırf ofisdə çalışmaq, aktual mövzuları işləmək baxımından gənclərə üstün veririk. Hərçənd, bizim erməni versiyamızda 75 yaşlı əməkdaş da var.

- Sosial şəbəkədən müşahidə etdiyim qədərilə əməkdaşlarla çox səmimisiniz. Yəni onlarla dostcasına davranırsınız. Bu münasibət iş prosesində sizə mane olmur ki?

- Yox, çünki çox sağ olsunlar, uşaqların heç biri aramızdakı dostluq və səmimiyyətdən sui-istifadə etmirlər. Səmimiyyət və dostluq öz yerindədir, subordinasiya da öz yerində.

- Son olaraq gələcək hədəflər və planlar barədə məlumat verməyinizi istərdim.

- Bir ilə yaxın olar ki, video formatda da xəbərlər hazırlayırıq. Çox yaxın vaxtda o istiqaməti daha da genişləndirmək və keyfiyyətcə tamam yeni mərhələyə keçirməyi düşünürük.