Günəşdəki ürək formalı ləkə nədir?
“Ölkə.Az” xəbər verir ki, maqnit sahəsindən ibarət fiqurun mərkəzi Yerə tərəf yönəlib.
Fiqur 3 oktyabr tarixində, gecə saatlarında peyda olub. Bir neçə saatdan sonra isə yoxa çıxıb. Alimlər bunu qara ürək adlandırıblar. Alimlər bildiriblər ki, fiqurun xarici konturu maqnit dalğaları ilə əhatə olunub. Mərkəzində isə parlaq qaynar aktiv bölgə olub. Ehtimal edilir ki, fiqurun ölçüsü 1 milyon kilometr olub.
Dünya mətbuatında yayılmış bu informasiya böyük müzakirələrə səbəb olub. Bəziləri bu əlamətlərlə dünyanın sonunun gəldiyini deyir. Bəziləri isə bununla Günəşin söndüyünü düşünür.
Azərbaycanlı mütəxəssislər isə bunu cəfəngiyyat adlandırırlar. Məsələ ilə əlaqədar AMEA Şamaxı Astrofizika Rəsədxanası ilə əlaqə saxladıq. Rəsədxanadan “Ölkə.Az”a bildirdilər ki, deyilənlərin hamısı mənasız şeylərdir.
“Bu cəfəngiyyatdır. Hazırda Günəşin səthində ləkələr müşahidə olunur. Bunu isə elmi izahı var”, - deyə rəsədxanadan bildirilib.
Günəşdə baş verən partlayışlara və maqnit dalğasına gəlincə, rəsədxananın elmi işlər üzrə direktor müavini Xıdır Mikayılov “Ölkə.Az”a açıqlamasında bildirmişdi ki, baş verən hadisə təbii prosesdir.
Məsələ ilə əlaqədar astroloq Səbuhi Rəhimli “Ölkə.Az”a açıqlamasında bildirib ki, son 20 ildə Günəşdəki aktivlik artıb. Onun sözlərinə görə, bu minlərlə alim tərəfindən təsdiqlənib.
“Rəsədxanalar, NASA-nın özündə dəfələrlə bu barədə açıqlamalar verilib. Təsəvvür edin ki, Günəşdə ən balaca sıçrama 27 min kilometr hündürlükdədir. Son illərdə biomaqnit dalğalarının artması, “qara dəlik”in getdikcə genişlənmə Yerə birbaşa təsir edən amillərdəndir. Günəş Yerə birbaşa təsir edir. Son dövrlər baş verən hadisələr, təbii fəlakətlərin artımı, qəfil iqlim dəyişmələri bundan irəli gəlir. Günəşdəki görüntülərin “ürək” şəklində olması isə mistik baxışlardır. Birmənalı olaraq deyə bilərik ki, maqnit dalğaları nəinki Yerə, bütün Kainata yayılır. Bu da təbii olaraq bizə təsir edir”.
Ziya Səccad
Ölkə.Az
