Deputat Hacı Qalibi məhkəməyə məcburi gətirmək barədə vəsatət qaldıracaq

Bu gün Sabunçu Rayon Məhkəməsində Milli Məclisin deputatı Çingiz Qənizadənin keçmiş həmkarı Qalib Salahzadəyə qarşı xüsusi ittiham qaydasında qaldırdığı iddia üzrə məhkəmə iclası başlayıb.

"Ölkə.Az" xəbər verir ki, bu barədə "Report"a Ç.Qənizadənin vəkili Raqif Mustafayev məlumat verib.

Onun sözlərinə görə, hakim Ziya Şirinovun sədrliyi ilə keçirilən prosesdə Q.Salahzadə məhkəməyə gəlməyib: "Qalib Salahzadə məhkəməyə ərizə göndərib ki, iclasda iştirak edə bilməyəcək. Məhkəmə də onun iştirakı olmadan keçirilmədi. Mən məhkəmədə bir neçə vəsatət qaldıracaqdım, amma növbəti dəfəyə qaldı".

Vəkil qeyd edib ki, növbəti iclasda da Q.Salahzadə məhkəməyə gəlməsə vəsatətlə çıxış edəcək: "Vəsatət qaldıracam ki, o, məhkəməyə məcburi gətirilsin".

Məhkəmə iclası oktyabrın 12-nə təyin edilib.

Qeyd edək ki, Ç.Qənizadə Q.Salahzadənin Cinayət Məcəlləsinin 147-ci (böhtan) maddəsi ilə cinayət məsuliyyətinə cəlb edilməsini istəyir. Q.Salahzadənin məhkəməyə verilməsinə səbəb son günlər mətbuatda Ç.Qənizadəyə qarşı ağır ittihamlar səsləndirməsi göstərilib.