Azərbaycan kinosunun 116 yaşı tamam olur

Hər il ənənəvi olaraq 2 avqust tarixini kino işçiləri peşə bayramı kimi qeyd edirlər. 

Azərbaycan kino sənətinin tarixi 1898-ci il iyunun 21-dən başlayır. İlk filmlər Bakıda fotoqraf və nasir Aleksandr Mişon tərəfindən çəkilmiş xronika sujetləri və bir bədii kinosujetdən ibarət idi. Ta o vaxtdan tarix yazan kinolarımız bu gün də inkişafdadır.

Son illərdə kino sahəsinə dövlət marağının artması tarixi-vətənpərvərlik mövzularında çəkilmiş nisbətən iribüdcəli filmlərin meydana gəlməsinə kömək olub. 

Bu gün Azərbaycanda filmlər dövlət sifarişilə yanaşı özəl şirkətlərin xəttilə də çəkilir. Son 6 il ərzində kinostudiyalarda vətənpərvərlik və Qarabağ müharibəsindən bəhs edən “Qaydasız döyüş”, “Seçilən”, “Bulağıstan”, eləcə də, “Yaddaş”, “Xoca”, “Dolu” kimi bir sıra bədii filmlər hazırlanıb. Adıçəkilən filmlər dünyanın bir çox ölkəsində, habelə kino festivallarında nümayiş olunaraq tamaşaçıların rəğbətini qazanıb.

Novruz Cəfərov, Respublikanın əməkdar artisti, Gəncə Dövlət Dram Teatrının aktyoru: “Azərbaycan kinosu, əlbəttə, böyük inkişaf yolu keçib. 116 il az bir məsafə deyil. Bugünkü günümüzdə də çox uğurlu kinolar var. Artıq bir-birinin ardınca seriallar başlayır. Bunlarla yanaşı, bədii filmlər də çəkilir. Məsələn, “Dolu” filmini xüsusi vurğulamaq istəyirəm. O, Qarabağ mövzusunuda çəkilən ən yaxşı filmlərdəndir. Bundan başqa “Xoca” və başqa bir sıra filmlər var ki, təqdirə layiqdir”.

Qeyd edək ki, Prezident Heydər Əliyevin 2000-ci il 18 dekabr tarixli sərəncamı ilə avqustun 2-si Azərbaycan Milli Kino günü kimi rəsmiləşdirilib./kəpəz tv/

Ölkə.Az