Şimali Koreya və ABŞ toqquşması nüvə müharibəsi ilə nəticələnə bilər

“Ölkə.Az” xəbər verir ki, açıqlamaya əsasən, Şimali Koreyanın ABŞ-ı vurması an məsələsidir. Məlumata əsasən, Şimali Koreya qitələrarası ballistik raket sınaqlarına davam edir. Rusların bildirdiyinə əsasən 3 min kilometr məsafə qət edən raketləri var və modernləşdirməyə davam edirlər. Bu işlər başa çatdıqdan sonra raketlər ABŞ torpaqlarına qədər uça biləcək.

Azərbaycanlı siyasətçilər isə bu açıqlamaya birmənalı yanaşmırlar. Politoloq Razi Nurullayev “Ölkə.Az”a açıqlamasında bildirib ki, Şimali Koreya dünyanı hədələməkdə davam edir. Onun sözlərinə görə, Kim Çen İn hədəf kimi də Trampı seçib.

“Hazırda iki rəhbər arasında söz atışması gedir. Onların sözdən hərəkətə keçəcəyi gözlənilən deyil. Əgər bu baş verərsə, III Dünya Müharibəsinin başlanmasına hazır olmaq lazımdır. Bu nüvə müharibəsinin başlanması deməkdir. Nüvə silahının hansısa ölkəyə atılması həmin ölkənin müəyyən bir hissəsinin yer üzündən silinməsi deməkdir. Bütün dünya bu addıma qarşı çıxar. Şimali Koreya təklənər və dünya ölkələri ABŞ-ın yanında yer alar. Bununla da, Şimali Koreyanın siyasi elitası yer üzündən silinər. Çox ciddi bir səbəb olmadan heç bir ölkə nüvə silahından istifadə etməz. Bu gün həmin səbəb yoxdur”, - deyə R.Nurullayev bildirib.

Ziya Səccad
Ölkə.Az