“Soros” Azərbaycandakı nümayəndəliyini ləğv etdi

Açıq Cəmiyyət İnstitutu Yardım Fondunun Baş Ofisi Azərbaycan nümayəndəliyini ləğv edib.

Ölkə.Az-ın qafqazinfo-ya istinadən verdiyi xəbərə görə, bu barədə vəkil Elçin Sadıqov məlumat verib. E.Sadıqov bildirib ki, nümayəndəliyin ləğvi barədə baş ofis dekabrın 10-da qərar verib: “ACİYF-nin Azərbaycan nümayəndəliyinin ləğv edilməsi ilə bağlı ləğvetmə işlərinə başlanıb. Ləğvetmə işlərini aparmaq ACİYF-nin etibarnamə əsasında nümayəndəsi vəkil Elçin Sadıqova həvalə edilib.

ACİYF bildirir ki, Azərbaycan həmişə ACİYF üçün dost ölkə olub. ACİYF Azərbaycanda təhsilin, medianın və hüququn aliliyinin təmini üçün çalışıb. ACİYF-nin məqsədi Azərbaycan dövlətinin və cəmiyyətinin rifahı olub. Bu məqsədlə müxtəlif dövlət qurumları, kommersiya və qeyri kommersiya təşkilatları ilə əməkdaşlıq edib.

ACİYF Azərbaycan nümayəndəliyinin işçiləri və ofisi yoxdur, ofis boşaldılıb.

Ümid edirik ki, son günlər mətbuatda ACİYF-nin Azərbaycan Respublikasındakı nümayəndəliyi ilə bağlı əsassız fikirlər və məlumatlar ciddi qəbul edilməyəcək, başladılan proseslər hüququn aliliyi çərçivəsində həll ediləcək”.

Ölkə.Az