“İŞİD qüvvələri orada bir vasitə kimi istifadə olundu”

“Ölkə.Az” xəbər verir ki, ordu Kürd Muxtariyyətinin əlində olan və mübahisəli olaraq qəbul edilən bölgələrə təşkil olunan hərbi əməliyyatın bütün hədəflərinə çatdığını açıqlayıb. Kərkükdə təhlükəsizliyi təmin etmək üçün başlayan əməliyyatın komandanlığının açıqlamasında deyilir:

“Kərkükdə təhlükəsizlik təmin edildi. Bu, Dibis rayonu, Multeka nahiyəsi, Cənubi Bay Hasan, Şimali Bay Hasan və Habbaz neft sahələrini də əhatə etdi”.

Ümumiyyətlə son vaxtlar İraq ərazisində, əsasən Şimali İraq və Kərkükdə İŞİD terrorçularının adı ilə bağlı müxtəlif və bir-birinə zidd xəbərlər yayılır. Terrorçular gah bu əraziləri işğal edir, gah da kürdlər buranı ələ keçirirlər. Bu bölgə ilə əlaqədar baş verən ziddiyyətli hadisələrə azərbaycanlı siyasətçilər də birmənalı yanaşmır.

Politoloq Arzu Nağıyev “Ölkə.Az”a açıqlamasında bildirib ki, İraq ordusu vaxtı ilə İŞİD-i heç bir silahsız, döyüşsüz ölkə ərazisinə buraxmışdı. Onun sözlərinə görə, bu da sonradan böyük problemlərlə nəticələndi.

“Sonradan kürd və peşmərgə qüvvələrinin köməyilə İŞİD terrorçularının bir sıra qüvvələrini məhv elədilər. Onun da əvəzinə kürd quruplaşmaları Kərkükü ələ keçirtdi. Hətta Şimali İraq ərazisində muxtariyyətlərini elan edəndə Kərkükü öz ərazilərin qatdı. Bərzani gözəl başa düşürdü ki, Kərkükü və mübahisəli olaraq qəbul edilən bölgələri əldə saxlaya bilməyəcək. Sonradan İŞİD terrorçuları Kərkükə hücuma keçdilər. İraq ordusunun əsas məqsədi Kərkükdən və ümumiyyətlə neft yataqları olan ərazilərdən kürdləri sıxışdırıb çıxarmaq idi. Onlar buna nail oldular. İŞİD qüvvələri orada bir vasitə kimi istifadə olundu. Terrorçuları çıxartmaq adı ilə eyni zamanda kürdləri də həmin ərazilərdən çıxartdılar”, - deyə A.Nağıyev bildirib.

Ziya Səccad
Ölkə.Az