Ucar: şəhid ailəsinin 1400 manatı \"buxarlandı\"

01.12.2014-cü il tarixində Ölkə.az-da "Beynəlxalq bankın müdiri şəhid ailəsinin puluna göz dikdi" başlıqlı yazı dərc olunmuşdu.

Məlumatda bildirmişdik ki, Beynəlxalq bankın Ucar rayon filialının müdiri Tariel Niftəliyev şəhid ailəsi olan Ucar rayonu Bağman kənd sakini Kərimova Gülabatın Müseyib qızına məxsus 1400 manat vəsaiti onun kartından çıxarıb. Kərimova Gülabatın pullarını tələb edəndə isə bankdan gah "kartın kodları qarışıb", gah da "başqası tərəfindən çıxarıldığı" deyilib.

Beynəlxalq Bankın Ucar filialının müdiri Tariyel Niftəliyev hadisədən 3 gün sonra bildirib ki, pulu bankomatdan başqası çıxarıb. Məsələni araşdırıb pulu qaytaracağıq.

Baş vermiş hadisə ilə bağlı Kərimova Gülabatın redaksiyamıza zəng edərək bildirdi ki, "hələ də pulumu qaytarmayıblar. Beynəlxalq bankdan deyirlər ki, pulu çıxardanın şəkili var bizdə. Guya onu çıxardan kimdirsə, bankomatdan pul çıxararkən şəkli təhlükəsizlik kameraları tərəfindən çəkilib. Şəkli çəkilib lap yaxşı, polisə versinlər, polis tapsın, məsələ də aydınlaşsın. Bir də ki, mən inanmıram o pulu başqası çıxara bilsin. Pulu çıxarmaq üçün kartın kodun bilmək lazım idi".

Kərimova Gülabatın müxbirimizlə telefonda danışarkən Ucar rayon prokrorluğuna şikayət ərizəsi ilə müraciət etdiyini də bildirib.

"Ancaq prokrorluq işçiləri rayonda ağır cinayəti araşdırdıqlarını bəhanə gətirərək mənim şikayətimə sonra baxacaqlarını dedilər", deyə aldadılmış şəhid yoldaşı sözlərini bitirib.

Redaksiya: Mövzunu davam etdirəcəyik...

Səxavət Məmməd
Ölkə.az