REAL hərəkatının partiyaya çevrilməsi üçün yenidən müraciət edəcəyik

REAL hərəkatı qurultay keçirmək üçün Bakı Şəhər İcra hakimiyyətinə müraciət ünvanlasa da, şəhər meriası nəzərdə tutulan vaxtda qurultay keçirmək üçün yerin olmadığını bildirib.

REAL hərəkatının partiyaya çevrilmə prosesi, qurultaya yerin ayrılmaması və İlqar Məmmədovun yazdığı nizamnamənin vəkilin əlindən alınması məsələsinə REAl hərəkatının icraçı katibi Natiq Cəfərli "Ölkə.Az"-da aydınlıq gətirib:

"REAL hərəkatı bu gün partiyaya çevrilməyəcək. Bu gün keçiriləcək mətbuat konfransı qurultayla bağlı rəsmi müraciətimizə rəsmi "yox" cavabının gəlməsi haqqında olacaq. Bu gün mətbuat konfransında bundan sonra hansı addımlar atacağımızı açıqlayacağıq".

İlqar Məmmədovun partiyanın nizamnaməsini vəkilə verərkən sənədlərin vəkilin əlindən alınması iddiasına gəldikdə isə Natiq Cəfərli bildirdi ki, bəli, bu doğrudur:

"Bütün proseslərdə çalışmışıq ki, İlqar Məmmədovu vəkillər vasitəsi ilə məlumatlandıraq. Nizamnamənin son variantı ilə bağlı müzakirələr gedir və İlqar Məmmədovun təkliflərini gözləyirdik. İlqar Məmmədovun yazılı təkliflərinin bizə çatdırılmasına maneçilik yaradılıb. İlqar Məmmədov təkliflərini yazmışdı, onu vəkilə verəndə əlindən alınıb. Ona görə də, İlqar Məmmədovun bəzi fikirlərini hələ almamışıq. Ancaq telefon vasitəsi ilə prinsipial məsələlərə öz fikirini bildirib. Çalışacağıq ki, vəkillər vasitəsi ilə onun digər fikirlərini də alaq".

Nəzərdə tutulmuş qurultaya yox cavabının səbəbinə gəldikdə isə REAL hərəkatının icraçı katibi qeyd etdi ki, cavab səbəb yox, bəhanədir:

"Biz 3 yer istəmişdik, səbəb göstərilib ki, 3 yerdə də oktyabr ayının 29-da tədbir keçiriləcək. Bir çox partiyaların qurultay keçirdiyi Suraxanı rayon Səttar Bəhlulzadə adına Mədəniyyət Evində isə Suraxanı əhalisi üçün pulsuz film nümayiş ediləcəyi üçün REAL hərəkatının qurultay keçirməsinə yer verməyiblər".

Sonda Natiq Cəfərli bildirdi ki, REAL hərəkatının partiyaya çevrilməsi üçün yenidən müraciət edəcəklər.

Səxavət Məmməd
Ölkə.Az