Karles Puçdemon İspaniya hökumətinə meydan oxudu

“Ölkə.Az” xəbər verir ki, bu barədə “El Pais” telekanalı məlumat yayıb. Verilən məlumata görə, Puçdemon bildirib ki, Madridin tələbini və qərarlarını qəbul etmirlər.

“Biz azad dövlətin yaradılması üzərində işi davam etdirəcəyik. İspaniya hökumətinin qəbul etdiyi qərar bizim müstəqilliyimizin əleyhinədir. Hökumət yaxşı bilir ki, müstəqillik qərarını yalnız parlament saxlaya və aradan qaldıra bilər. Bir daha bildirirəm ki, bizim həm səbrimiz, həm dözümümüz və həm də müstəqillik uğrunda mübarizə aparmaq üçün qəti iradəmiz var”, - deyə Puçdemon əlavə edib.

Karles Puçdemonun çıxışı zamanı diqqət çəkən məqamlardan da biri İspaniya dövlət bayrağının tribunada olmaması olub. Bununla da, Kataloniya hökumətinin vəzifəsindən kənarlaşdırılmış rəhbəri İspaniya dövlətinə hörmət etmədiyini bildirmək istəyib.

Qeyd edək ki, İspaniyanın Kataloniya əyaləti müstəqillik referendumu keçirib. İspaniyanın Kataloniya muxtar bölgəsində keçirilən referendumda xalqın 90.09 faizi müstəqilliyin lehinə səs verib. Oktyabrın 1-i keçirilən referendumun nəticələrinə görə respublika formasında müstəqil dövlət olmaq hüququ qazanıb. Bundan sonra Kataloniya rəhbəri Karles Puçdemon parlamenti müstəqillik elan etməyi dayandırmağa çağırıb. Lakin sonradan Kataloniya rəhbərliyi müstəqillik haqqında bəyannaməni imzalayıb. Müstəqillik haqqında bəyannamə Kataloniya hökumətinin rəhbəri Karles Puçdemon, onun müavini Oriol Junkeras və region parlamentinin spikeri Karme Forkadel tərəfindən imzalanıb. Bundan sonra sənəd 72 deputat tərəfindən imzalanıb.

Dünən Kataloniya parlamentində regionun müstəqilliyi barədə Bəyannamə qəbul edilib. Parlamentdə keçirilən gizli səsvermə zamanı deputatlardan 72-si Müstəqillik Bəyannaməsinin lehinə, 10-u əleyhinə səs verib. Prosesdə 2 nəfər səsvermədə iştirak etməyib.

İspaniya Senatı isə Kataloniyanın muxtariyyətini ləğv edib. Senat hökumətin müraciəti əsasında İspaniya Konstitusiyasının 155-ci maddəsinin tətbiq olunmasına qərar verib. Bu, Kataloniyanın muxtariyyətinin müvəqqəti ləğvi və bölgənin mərkəzi hökumətin birbaşa idarəçiliyinə keçməsi deməkdir.

Ziya Səccad
Ölkə.Az