“Fizuli Məmmədovun bir namizədi var, o da İlham Əliyevdir”

R.Quliyev “Ölkə.Az”-a açıqlamasında deyib ki, bu cür məlumatlar həqiqəti əks etdirmir:

“Bu məsələ ilə əlaqədar dəyərli media nümayəndələrimiz üçün xüsusi açıqlama ilə çıxış etmək zərurəti hiss etdim. Bunu hər kəs yaşadığı həyatından da bilir ki, ailədaxili məsələləri geniş ictimai müzakirəyə çıxarmaq nə etik cəhətdən doğrudur, nə də milli dəyərlərimizə uyğundur. Nəinki ictimai liderin, ümumiyyətlə heç kimin şəxsi həyatı ictimai müzakirə mövzusu olmamalıdır. Əgər qardaşlar arasında problem varsa, bunu normal şəkildə aralarında müzakirə edib, mövcud olan problemi həll edə bilərlər. Bu cür məsələlər nə bizi, nə də digərlərini maraqlandıra bilməz, maraqlandırmamalıdır. Fizuli bəy minlərlə mövcud olan azərbaycanlı iş adamlarından biridir. Ancaq bu şəxs hər zaman milli məsələlərdə dövlətinin və Vətəninin yanında olub. Bu gün Rusiyada iş adamlarımızın sayı kifayət qədərdir. Onlar Rusiyanın milyarderlər siyahısında öncül yerlərdədirlər. Bu şəxslərin indiyə kimi hansısa milli layihələrə dəstək olduqlarını gördünüz? Yaxud da bu barədə eşitdinizmi? Əminəm ki, nə görüb, nə də eşitmisiniz. Belə olduğu halda milli vətənpərvərlik ruhu yüksək olan iş adamlarımızı incitməklə nəyə nail olmaq istəyirik? Onsuz da bu cür iş adamlarımız azlıq təşkil edirlər. Demək olar ki, yox dərəcəsindədir. Hətta, Avropada, Amerikada dünyanın müxtəlif ölkələrində biznes fəaliyyəti ilə məşğul olub dövlətdən maddi yardım uman kifayət qədər insanlar var”.

Diaspora lideri Hollandiyadakı Azərbaycan diasporunun lideri İlhan Aşkının da erməni təzyiqi ilə üz-üzə qaldığını söyləyib:

“Hollandiyadakı diaspora liderimiz, hörmətli İlhan Aşkın erməni təzyiqi ilə üz-üzə idi. Vəkil xərcinin yüksəkliyi İlhan bəyin işini çətinə salmışdı. Erməni diasporası güclü vəkillə təmin olunaraq hücuma keçmişdi. Belə olan halda mətbuat yazdı, bizlər səs saldıq, amma nə rəsmi qurumlarımız, nə iş adamlarımız İlhan bəyin məhkəmə xərclərinə yardım etmədilər. Yenə, Fizuli bəy meydana çıxaraq, İlhan bəyə sahib çıxdı. Füzuli bəy bu yaxınlarda aprel şəhidlərinin və qazilərinə ailələrinə mənzil bağışladı. Moskvada həbsə düşən, müalicəyə ehtiyacı olanlara, tələbələrə dəfələrlə maddi və mənəvi dəstək olub. Bunları edən şəxsin üzərinə hücum etmək heç kimə başucalığı gətirməz”.

R.Quliyev qeyd edib ki, Fizuli Məmmədov hər zaman Azərbaycan Prezidentinin siyasətini dəstəkləyib:

“Fizuli Məmmədovu 17 ildir şəxsən tanıyan insan kimi deyə bilərəm ki, o ictimai siyasi həyatının hər dövründə ölkə rəhbərliyinin siyasətini sözdə deyil, əməldə də dəstəkləyən şəxs olub. Fizuli bəyin 2018-ci ildə ölkədə keçiriləcək prezident seçkilərində namizəd olacağını iddia etmək məlumatsızlığın ən böyük göstəricisidir. Bunun üçün seçkilər haqqında qanunun tələblərinə cavab vermək lazımdır. Qanunda açıq-aşkar göstərilib ki, prezidentliyə namizəd olacaq şəxs Azərbaycan vətəndaşı olmalıdır. Fizuli Məmmədov isə həm Rusiya, həm də İtaliya vətəndaşıdır. Bu şərtlər altında olan adam seçkilər haqqında necə düşünə bilər? Seçkilər mövzusu həssas mövzudur. Bu mövzu üzərindən monipulasiya edib cəmiyyəti çaşdırmaq yanlışlıqdır. Bu gün həm Fizuli bəyin, həm də bizim bir namizədimiz var. O da ölkə daxili sabitliyin memarı, iqtisadi inkişafın, güclü diplomatiya və güclü ordunun komandanı İlham Əliyevdir”.

Vasif Həsənli
Ölkə.Az