Türkiyədə daha bir istefa şoku

Türkiyədə daha bir bələdiyyə sədri istefa verib.

“Ölkə.Az” xəbər verir ki, bu dəfə Balıkesir Böyükşəhər Bələdiyyəsinin sədri Ahmet Edib Uğur istefa verdiyini açıqlayıb. Bu barədə o özü jurnalistlər üçün keçirdiyi mətbuat konfransında məlumat verib. A.E.Uğur həm də hakim partiyadan çıxdığını bildirib.

“Qərarımın səbəbini açıqlamaq istəmirəm. Sadəcə onu deyim ki, çox kövrək və üzgünəm. Lakin çox rahatam. Artıq bu vəzifələrdə çalışmağıma ehtiyac qalmadı. İşimdə səhv etmədim. FETO və digər terror təşkilatları ilə əlaqələrim yoxdur”, - deyə Uğur bildirib.

Qeyd edək ki, Türkiyədə hakim Ədalət və İnkişaf Partiyası (AKP) Ankara, Bursa və Balıkesir bələdiyyələri sədrlərinin istefası ilə bağlı qərar qəbul etmişdi. Ankara və Bursa böyük şəhər bələdiyyələrinin sədrləri ötən həftə istefa veriblər.

Xatırladaq ki, bundan öncə, sentyabrın 22-də İstanbul Böyükşəhər Bələdiyyəsinin sədri Kadir Topbaş istefa verib. K.Topbaş 2004-cü ildən İstanbul Böyükşəhər Bələdiyyəsinin sədri idi. O, Ərdoğanın ən yaxın dostu hesab olunurdu. Onun istefası ölkədə böyük müzakirələrə səbəb olmuşdu. Daha sonra Ankara Böyükşəhər Bələdiyyəsinin sədri Melih Gökçək istefa verib.

Ziya Səccad
Ölkə.Az