Avropa Şurasının Bakı ofisinin rəhbəri: “Azərbaycanda korrupsiya ilə mübarizəni davam etdirmək istəyirik”

“Ölkə.Az”-ın məlumatına görə, görüş zamanı Azərbaycandan olan jurnalistlər, ədliyyə və inzibati idarəetmə orqanlarının işçiləri və hüquq ekspertləri üçün həyata keçirilmiş layihənin nəticələri təqdim edilib.

Avropa Şurasının Bakıdakı ofisinin rəhbəri Zoltan Hernyes bildirib ki, 2015-2017-ci illər ərzində “Yaxşı İdarəçilik üçün Tərəfdaşlıq” proqramı çərçivəsində Azərbaycanda dörd layihə həyata keçirilib. 

Onun sözlərinə görə, layihələrin əsas məqsədi Azərbaycanda KİV və ifadə azadlığının inkişafı, inzibati idarəetmədə korrupsiyaya qarşı mübarizə və korrupsiyanın qarşısının alınması bacarıqlarının gücləndirilməsi, Ədliyyə Akademiyasının rolunun və bacarıqlarının artırılması, hakimlərin təlimləndirilməsi, eləcə də ölkədə ədliyyə sisteminin səmərəliliyinin və keyfiyyətinin artırılmasından ibarətdir:

“Bu, Avropa İttifaqı və Avropa Şurasının birgə həyata keçirdiyi əsas proqramıdır. Gələn il də bu çərçivədə əməkdaşlıq davam edəcək. Biz gələn il də Azərbaycanda korrupsiya ilə mübarizə layihəsini davam etdirmək niyyətindəyik. Biz yalnız naliyyətləri deyil,  gələcək layihələri də müzakirə edəcəyik. Azərbaycan tərəfinə bu layihələrin həyata keçirilməsində yaratdığı lazımı şəraitə görə təşəkkür edirik”.

Avropa İttifaqının Azərbaycandakı nümayəndəliyinin rəhbəri, səfir Kestutis Yankauskas isə bildirib ki, insan haqları, qanunun aliliyi və demokratiya Azərbaycanla əməkdaşlıq etdiyimiz əsas sahələrdən biridir:  

“Avropa İttifaqı həm “Şərq Tərəfdaşlığı”,  həm də yeni saziş əsasında Azərbaycanla layihələr həyata keçirməyə hazırdır. Biz korrupsiya ilə mübarizə layihəsini davam etdirməyi qərara almışıq. Həmçinin, bir sıra yeni layihələr də nəzərdə tutulub”. 

Səfir deyib ki, qeyd edilən 4 layihəyə- KİV-lərdə  ifadə azadlığının inkişafı, inzibati idarəetmədə korrupsiyaya qarşı mübarizə və korrupsiyanın qarşısının alınması bacarıqlarının gücləndirilməsi, Ədliyyə Akademiyasının rolunun və bacarıqlarının artırılması, hakimlərin təlimləndirilməsi, eləcə də ölkədə ədliyyə sisteminin səmərəliliyinin və keyfiyyətinin artırılması üçün 5 milyon avroya yaxın vəsait ayrılıb.

Görüş jurnalistlər üçün qapalı şəraitdə davam etdirilib. 

Vasif Həsənli
Ölkə.Az