Azərbaycanın AİB və ümumən postsovet məkanında hansısa inteqrasiyon birləşmələrdə iştirakı mümkün deyil

Azərbaycan tərəfi dəfələrlə bu təşkilata üzv olmaq üçün şərtlərini açıqlasa da, ancaq bu tip xəbərlər çıxmaqda davam edir. Bəzi ekspertlər iddia edir ki, Azərbaycanın AİB-ə üzv olması təşkilatı daha cəlbedici edəcək. Buna görə də, kənardan bu tip məlumatlar bilərəkdən gündəmə gətirilir.

Məsələ ilə bağlı fikirlərini politloq İlqar Vəlizadə Ölkə.Az-da bölüşüb:

"Əslində Azərbaycanın xarici siyasətinin gündəmində Avrasiya İqtisadi Birliyinə (AİB) qoşulmaq yoxdur. Bunu aktuallaşdıran Azərbaycanın özü deyil, kənar qüvvələrdir. Azərbaycanın AİB-ə və ümumən postsovet məkanında hansısa inteqrasiyon birləşmələrdə iştirakı mümkün deyil. Ona görə ki, bütün bu təşkilatlarda Ermənistan iştirak edir. Belə vəziyyətdə Azərbaycanın bu təşkilatlarda iştirakı mümkünsüz görsənir. Azərbaycan bu təşkilatlara qoşularsa təşkilatların tələblərinə və nizamnaməyə uyğun hərəkət etməlidir. Nizamnamədə də açıq göstərilir ki, ölkələr arasında sərhədlər açıq olmalı, ticarət mübadiləsi aparılmalıdır. Əgər məsələ KTMT ilə bağlıdırsa üzv ölkələr bir-birilərinə hərbi dəstək verməlidir. Azərbaycan isə bu tələbləri yerinə yetirə bilməyəcək. Çünki işğalçı dövlətlə birgə hansı hərbi, siyasi, iqtisadi məsələləri həll edə bilər? Buna görə də, Azərbaycan bu addımı atmayacaq".

Azərbaycanın AİB-ə qoşula bilməməsinin başqa səbəblərinin də olduğunu deyən politoloq, bildirib ki, Azərbaycan Ümumdünya Ticarət Təşkilatının üzvü deyil, ancaq AİB üzvlərinin hamısı o təşkilatın üzvləridir:

"Azərbaycan ən azı Ümumdünya Ticarət Təşkilatına üzv olmalıdır ki, digər ölkələrlə bərabər şəkildə fəaliyyət göstərsin.

Bunlardan başqa Azərbaycanın bu təşkilatlara qoşulmağa praktiki marağı yoxdur. Çünki AİB Azərbaycana heç bir real mənfəət gətirməyəcək. MDB ölkələri ilə Azərbaycanın xarici ticarət balansı 9-12% təşkil edir. Bu nə dərəcə əhəmiyyətlidir ki, Azərbaycanın xarici ticarət balansında 9-12% yer tutan ölkələrlə daha sıx əməkdaşlıq etsin. Bu amillərə görə, Azərbaycan yaxın vaxtlarda bu təşkilatlara qoşulmayacaq".

Səxavət Məmməd
Ölkə.Az