Qabil Hüseynli: "Qarabağa Bakıdan icazəsiz gələn əcnəbiləri..."

Bir müddət öncə alman deputatın Dağlıq Qarabağa səfər etdiyi üçün Azərbaycanın "qara siyahısına" düşmüşdü. Azərbaycan bu məsələ ilə bağlı Almaniyaya etiraz notası verdi və bu qalmaqal Berlinlə Bakı arasındakı münasibətlərin soyumasına gətirib çıxardı. 

Dünən isə başqa bir avropalı deputat, fransız Fransua Roşbluan Dağlıq Qarabağa səfər etdiyi üçün hökümətimiz bu dəfə də Fransaya nota verdi. Ancaq görünən odur ki, bu verilən notaların heç bir əhəmiyyəti yoxdur və avropalılar erməni separatçılarına baş çəkməkdə davam edəcəklər. 

Bu qalmaqalla əlaqədər politoloq Qabil Hüseyinli Ölkə.az-a danışdı:

Qabil Hüseyinli: "Bu məslələr BMT səviyyəsində müzakirə edilməlidir. Çünki həmin dövlətlər deyirlər ki, deputatlar müstəqildir, onlar istədikləri hərəkətləri edə bilərlər, halbuki, onlar öz deputatlarına Azərbaycanın ərazi bütövlüyünü tanınması haqqındakı müddüanı xatırlatmalı idilər. Bu məsələ ya BMT-nin Təhlükəsizlik Şurasında ya da BMT-nin Baş Məclisində qaldırılmalıdır və qeyd edilməlidir ki, "mənim ərazimə, mənim icazəm olmadan xarici ölkələrin deputatlarının getməsi məsələsi bu beynəlxalq hüquq normalarının pozulması və təcavüzkarı şirnikləndirmək deməkdir".

Həmin ölkələrə nota verməkdən əlavə həmin ölkələrin başçıları ilə də danışıqlar aparmaq lazımdır. Ancaq birinci BMT-dən başlamaq lazımdır. Baxmaq lazımdır ki, beynəlxalq hüquq normaları üzərində qurulmuş BMT bu məsələyə necə reaksiya verir. Notaları paylamaqla heç nəyə nail olmaq olmaz. O dövlətlər notanı alır və əks cavab göndərirlər. Cavabda yazırlar ki, bizdə deputatlar azaddır, biz deputatların hara gedib-gəlməsinə nəzarət edə bilmərik və yaxud da yazırlar ki, "bu halların olmasına təsüflənirik, çalışacağıq ki, bu hallar bir daha təkrarlanmasın".

Gürcüstanın qəbul etdiyi qanun çox ağıllı qanundur. Azərbaycan Qarabağa gedən adamları "qara siyahı"ya salır və işini bitmiş hesab edir. Əgər qanun qəbul edilsə və bu qanunda göstərilsə ki, "ölkənin işğal olunmuş ərazisinə rəsmi Bakının icazəsi olmadan girən deputat, müğənni, futbol kulubu, və.s beynəlxalq hüquq normalarını pozmuş, cinayət məsuliyyəti daşıyan şəxs hesab edilsin və o şəxslərin Azərbaycanın hüquq mühafizə orqanları tərəfindən beynəlxalq axtarışa başlanılsın", onda effekt verər.

Bu qanunun gecikməsi, qanunun üzərində intensiv işləməməkdən irəli gəlir. Bütün fikir Qarabağın azad olunmasına yönəlsə, undi bu qanun da qüvvəyə minmişdi və öz effektini də vermişdi".

Səxavət Məmməd

Ölkə.az