Ankara Rusiyadan “S-400” raketlərini aldı

“Ölkə.Az” xəbər verir ki, Ankara Rusiyadan “S-400” raketlərini alıb. Bu barədə Türkiyənin müdafiə naziri Nurəddin Canikli bildirib. Onun sözlərinə görə, axır ki, bu iş uğurla başa çatıb.

“Uzun zaman idi Rusiya ilə bu sahədə danışıqlar aparılırdı. Nəhayət ki, bu işi uğurla tamamladıq. Rusiyadan “S-400” raketləri alındı”, - deyə Nurəddin Canikli bildirib.

Türkiyəli nazir vurğulayıb ki, rəsmi Ankara bununla kifayətlənməyəcək:
“Biz Türkiyənin havadan müdafiə sistemini gücləndirmək üçün “S-400” raketlərini almışıq. Lakin işimiz bununla bitmir. Türkiyə havadan müdafiə sistemini daha da gücləndirmək üçün özü xüsusi təchizat istehsal edəcək. Bu sahədə işlərə başlanılıb”.

Qeyd edək ki,  Ankara və Moskva  arasında Rusiya istehsalı olan “S-400” zenit- raket komplekslərinin alınmasına dair saziş imzalanıb. Türkiyə prezidenti Rəcəb Tayyip Ərdoğan “S-400” komplekslərinə görə Ankaranın ilkin ödəniş etdiyini bəyan edib. Məsələ ilə əlaqədar bir müddət əvvəl  alyansın baş katibi Yens Stoltenberq bildirmişdi ki, NATO üzvləri olan hər bir dövlət istədiyi ölkədən silah və sursat ala bilər. Onun sözlərinə görə, bu səbəbdən də, Türkiyə Rusiyadan “S-400” kompleksləri alması barədə NATO ilə məsləhətləşələr aparmayıb.

Lakin sonradan NATO tərəfindən Türkiyənin Rusiyadan “S-400” kompleksləri alması məsələsi belə şərh edilib: “Türkiyənin Rusiyadan “S-400” kompleksləri alması heç də Ankaranın NATO-dan uzaqlaşmasını və ya Rusiya ilə yaxınlaşmasını təsdiqləmir”.

Ziya Səccad
Ölkə.Az