“Zaman-Azərbaycan”nın baş redaktoru ölkədən getdi

Dünəndən etibarən polis Türkiyənin “Zaman” qəzeti və “Samanyolu” televiziyası (STV) ilə bağlı əməliyyatları davam etirir.

Ölkə.Az a24.az-a istinadən xəbər verir ki, Türkiyə polisi dünən “paralel yapı” əməliyyatı çərçivəsində aralarında polis və media mənsublarının olduğu 25 nəfəri saxlayıb.

Anadolu Agentliyinin yaydığı məlumata görə, İstanbul prokuroru Hadi Salihoğlu haqlarında saxlanma qərarı çıxarılmış 31 nəfər şübhəli şəxsin adını açıqlayıb. Bu arada “Zaman” qəzetinin baş redaktoru Əkrəm Dumanlı qəzetinin redaksiyasında saxlanılıb.

Bu arada hər kəsi Fətullah Gülənin media orqanlarının digər ölkələrdə olan nümayəndəliklərinin taleyi düşündürür. Türkiyənin “Zaman” qəzetinin bir sıra ölkələrdə olduğu kimi Azərbaycanda da nümayəndəliyi var. Məsələ ilə bağlı «Zaman» qəzetinin redaksiyası ilə əlaqə saxladıq. Adını açıqlamayan telefondakı şəxs a24.az-ın əməkdaşı ilə söhbətində bildirdi ki, Türkiyədə baş verənləri sizlər kimi biz də mediadan izləyirik. Bunun bizə heç bir aidiyyətı yoxdur. “Zaman Azərbaycan” qəzetinin köşə yazarı Əli Çərkəzoğlu da əməkdaşımızla telefon əlaqəsi zamanı bildirib ki, bu barədə heç bir söz danışa bilməz: “Mən də sizin kimi mətbuatdan izləyirəm Türkiyədə baş verən prosesləri”.

Əldə etdiyimiz məlumata görə, “Zaman-Azərbaycan” qəzetinin baş direktoru Süleyman Ünal artıq Türkiyədədir. Onun Türkiyəyə bu və ya digər hansı məqsədlər üçün getdiyi dəqiq bilinmir. Məsələ ilə bağlı saytımızda Süleyman Ünalın da mövqeyini dərc etməyə hazırıq.

“Zaman Azərbaycan” qəzetinin baş redaktoru Süleyman Ünal 2010-cu ilin yanvar ayından Azərbaycandadır. 11 il Avstraliyada dərc olunan “Zaman Avstraliya” qəzetinə rəhbərlik etdikdən sonra Azərbaycana gəlib. Xatırladaq ki, “Zaman Azərbaycan” qəzetinin Süleyman Ünaldan əvvəlki Baş redaktörü Enis Cansevər olub. Hazırda Sidneydə “Zaman Avstraliya” qəzetinə baş redaktorluq edir.

Ölkə.Az