Avropa qoşunları formalaşarsa NATO parçalanacaq

"Avropa müdafiə paktı"nın reallaşması NATO-ya alternativ yeni hərbi birliyin yaranmasına gətirib çıxara bilər.

Hazırda Almaniya və Fransanın Avropa qoşunlarının yaradılması təklifi əsas müzakirə edilən məsələlərdən birinə çevrilib. Bunun NATO-ya alternativ olmadığı deyilsə də, ekspertlər "Avropa müdafiə paktı"nın imzalanmasının NATO-nun sonunu gətirə biləcəyini iddia edirlər.

Yaranmış vəziyyəti politloq İlqar Vəlizadə "Ölkə.Az"a şərh edib:

"Avropada 1990-cı illərin sonuna qədər Qərbi Avropa İttifaqı adlı qurum var idi. Qərbi Avropa İttifaqı hərbi-siyasi qurum idi. Həmin qurumda mühüm rolu Fransa ilə Almaniya oynayırdı. Fransa ilə Almaniya birgə korpus yaratmışdılar. Korpus təkcə rəmzi yox, real funksiyalara malik idi. 1990-cı illərin sonunda Qərbi Avropa İttifaqı ləğv edildi.

Bir neçə il bundan əvvəl Almaniyanın baş naziri Angela Merkel çıxışında bildirdi ki, Avropa hərbi birləşmələri yaratmalıyıq. Hazırda bu təklifin arxasında bir neçə dövlət durur. Ancaq bu əslində Almaniya və Fransanın ideyasıdır".

"Avropa müdafiə paktı" ideyası ilə bağlı danışan politloq qeyd edib ki, bu hələlik bir ideyadır və rəsmiləşməməsini görürük:

"Bu təklif özü özülyündə NATO-nu parçalaya bilməz. "Avropa müdafiə paktı" ideyası nəticəsində Avropa qoşunları formalaşarsa NATO parçalanacaq. NATO mövcudluğunu itirməyəcək. Ancaq NATO iki qütbə bölünəcək - Avropa və Şimali Amerika. Bu isə NATO-nun konsepsiyasına ziddir".

Səxavət Məmməd
Ölkə.Az