Pakistan hökuməti narazı əhali ilə danışıqlara getməyə hazırdır

“Ölkə.Az” xəbər verir ki, bu barədə “Geo TV” telekanalı məlumat yayıb. Verilən məlumata görə, bu barədə Pakistan daxili işlər nazirliyinin rəhbəri Axsan İkbal bildirib. Onun sözlərinə görə, istənilən an danışıqlar keçirilə bilər.

“Pakistanın hüquq-mühafizə orqanları istənilən vaxt narazı etiraçılarla görüşə hazırdır. Danışıqlar keçirməli və problemin həll yollarını axtarmalıyıq”, - deyə DİN rəhbəri bildirib.

Qeyd edək ki, bu gün Pakistanın paytaxtı İslamabadda hüquq-mühafizə orqanlarının oturaq aksiyanı dağıtmaq cəhdindən sonra polislə aksiya iştirakçıları arasında qanlı toqquşma baş verib. Toqquşmalar zamanı hər iki tərəfdən təxminən 250-dən çox insan yaralanıb, 4 nəfər ölüb.

Xatırladaq ki, “Teehrik-e-Labaik” hərəkatının fəalları artıq 3-cü həftədir Feyzabadda yolayrıcında şəhərin əsas küçələrini bağlayaraq oturaq aksiya keçirirlər. Aksiyaya səbəb hakimiyyət orqanlarının seçki haqqında qanuna ziddiyyətli düzəliş etməsi olub.

Ziya Səccad
Ölkə.Az