Bütün dünya ayağa qalxdı
Bütün dünya Pakistanda baş verən məktəbə hücumu pisləyir.
Şagirdlərin ölümünə səbəb olan həmin hücumu ABŞ-ın Pakistnadakı səfiri Richard Olson “qeyri-insani hərəkət” adlandırıb.
Pakistandakı hücumu Fransa prezidenti Fransua Olland, Almaniyanın xarici işlər naziri Frank Valter-Ştaynmayer, Nobel mükafatı laureatı Malala Yusifzay qınayıblar.
Əfqanıstan prezidenti Əşraf Qani günahsız uşaqların öldürülməsinin islama zidd olduğunu bildirib. ABŞ prezidenti Barak Obama isə terrorçuları “əxlaqsız” adlandırıb.
Pakistanın baş naziri Nəvaz Şərif bildirib ki, terrorizmin kökünü kəsənə qədər "Taliban" əleyhinə əməliyyat davam edəcək.
Baş nazir ölkədə 3 günlük matəm elan edərək "Biz ölkəmiz terrorizmdən tamamilə təmizlənənə qədər mübarizə aparacağıq və hər cür səy göstərəcəyik. Biz yaranmış vəziyyəti Əfqanıstanla müzakirə etdik və terrorla birgə mübarizə aparacağıq" deyib.
Bu arada BMT Baş katibi Pan Gi Mun hadisəni “qorxaqların dərs oxuyan uşaqlara hücümü” kimi adlandırıb.
Qeyd edək ki, bu gün altı yaraqlı Pişəvər şəhərindəki məktəbə hücum edib. Ekstremistlər avtomat silah, qumbaralarla silahlanıblar. Ölkənin güc qüvvələri terrorçulardan üçünü məhv edə bilib, biri isə özünü partladıb. Digər terrorçular binada barrikada qurublar. Ona görə də uşaqları uzun müddət təxliyə etmək mümkün olmayıb.
Son məlumatlara görə, 148 nəfər hücumun qurbanı olub, onlardan ən azı 126 nəfər uşaqdır. 120-dən çox şəxs yaralanıb, onları xəstəxanalara yerləşdiriblər. Hücum zamanı məktəbdə 500-dək şagird və müəllim olub. (anspress)
Ölkə.Az
