Avropanın ən yaşlı qadını 116 yaşında öldü
“Ölkə.Az” xəbər verir ki, bu barədə “Pais” qəzeti məlumat yayıb. Verilən məlumata görə, yaşlı qadın 116 yaşında ölüb. Ana Vela ad günüdən 2 ay sonra Barselonadakı qocalar evində vəfat edib.
“Ana Vela yuxuda olarkən, acı çəkmədən ölüb”, - deyə qəzet xəbər verib.
Bildirilir ki, Ana Vela 1901-ci ilin oktyabrında Andalusiya vilayətinin Puente-Xenil bələdiyyəsində doğulub. Onun səhhətində, demək olar, heç bir problem olmayıb.
Dərzi işləyən Ana Vela son illərdə İspaniyanın uzunömürlülük rəmzinə çevrilib. Onun qızlarından birinin 90, nəvəsinin isə 65 yaşı var.
Qeyd edək ki, Ana Vela İtaliyada yaşayan 118 yaşlı Emma Morano öləndən sonra Avropanın ən qoca insanı idi. E.Morano 1899-cu ildə İtaliyanın şimalındakı Pyemont vilayətində anadan olub. Onun 117 il, 137 gün yaşadığı bildirilib. Qadının ölüm səbəbi açıqlanmayıb.
Xatırladaq ki, Emma Morano 2016-cı ildən sonra dünyanın ən yaşlı insanı sayılırdı. Ona qədər, 2016-cı il may ayında vəfat edən amerikalı Suzanna Muşatt Cons dünyanın ən yaşlı insanı sayılırdı. O, 117 yaşında ölüb. Ondan əvvəl isə Yaponiyada yaşayan Yasurato Koyede dünyanın ən yaşlı insanı idi. 2015-ci ildə ölən yaponun 113 yaşı vardı. O, 1903-cü ildə Yaponiyada doğulmuşdu.
Ziya Səccad
Ölkə.Az
