Mirşahinin qardaşının məhkəməsi başladı
"Ölkə.Az" Xeber.news-a istinadən məlumat verir ki, hakim Novruz Kərimovun sədrliyi ilə araşdırılan prosesdə prokuror ittiham aktını elan edib.
M. Ağayev elan olunmuş ittihamla özünü təqsirli bilib və zərərçəkmişlərə dəyən ziyanı qaytaracağını bildirib.
Məhkəmədə məlum olub ki, M. Ağayev polis orqanlarına işə düzəltmə adı ilə vətəndaşlara qarşı ümumilikdə 86 min manat dələduzluq edib.
Məhkəmə prosesi dekabrın 25-də davam etdiriləcək.
Qeyd edək ki, Mirəddin Ağayev dələduzluqda ittiham edilir. Onun barəsində istintaq hələ ötən ilin noyabrında başlayıb. Belə ki, Qəzənfər Davud oğlu Qəzənfərov adlı şəxsin Səbail rayon Polis İdarəsinə şikayəti əsasında o, istintaqa cəlb olunub. Vətəndaş, Mirəddin Ağayevin dələduzluq yolu ilə onun 2000 manatını mənimsədiyini bildirib. Təqdim olunan sübutlar əsasında cinayət işi açılıb və bir neçə gün sonra M. Ağayev yaşadığı Yardımlı rayonunda saxlanılıb. May ayının əvvəllərində isə məhkəmə onun barəsində həbs qərarı çıxarıb.
İttihama görə, M.Ağayev 4 vətəndaşa qarşı ümumilikdə 86 min manat məbləğində dələduzluq edib.
Xatırladaq ki, ixtisasca həkim olan Mirəddin Ağayev Mirşahin Ağayevin böyük qardaşıdır.
