Gürcüstan prezidenti Putinlə müzakirələrə hazırdır

Tbilisidə prezidentin görüşə hazır olduğunu bəyan ediblər.

Ölkə.Az "Новости-Грузия" agentliyinə istinad edərək xəbər verir ki, Gürcüstan prezidenti Georgiy Marqvelaşvili rusiyalı həmkarı ilə Abxaziya və Cənubi Osetiya məsələlərinin müzakirəsi üçün görüşə hazırdır. Bu barədə Gürcüstanın Milli təhlükəsizlik şurasının katibi İrina İmerişvili bəyan edib.

Onun sözlərinə görə, Marqvelaşvili Putinlə məcburi köçkünlərin qaytarılması məsələsi, Rusiya Federasiyasının Abxaziya və Cənubi Osetiya ilə müqavilələrini müzakirə etməyə hazırdır.

Dünən baş tutan yekun mətbuat konfransda Putin bəyan etdi ki, Rusiya Moskvada Gürcüstan rəhbərliyinin istənilən nümayəndəsini - həm prezident, həm baş nazirini görməyə şad olar. Gürcüstan parlamentinin vitse-spikeri Manana Kobaxidze Rusiya ilə Abxaziya və Cənubi Osetiya arasında "Müttəfiqlik və strateji partnyorluq haqqında" müqavilənin imzalanması fonunda Putin-Marqvelaşvili dialoqunu qəbuledilməz adlandırıb.

Qeyd edək ki, sözügedən sənədin imzalanmasından sonra Cənubi Osetiyanın parlament başçısı Anatoliy Bibilov bəyan etdi ki, Moskva və Tsxinval gələn ilin əvvəlində daha da çox inteqrasiya xarakteri daşıyacaq analoji müqaviləni imzalaya bilərlər.

Rəşid Mustafazadə

Ölkə.Az