Türkiyədə fövqəladə vəziyyət yenə uzadılır

Türkiyədə fövqəladə vəziyyət daha üç ay müddətinə uzadılacaq.

“Ölkə.Az” xəbər verir ki, bunu Türkiyə Baş nazirinin müavini Bəkir Bozdağ deyib. B.Bozdağ qeyd edib ki, bu qərar Türkiyə hökuməti tərəfindən qəbul olunub. Baş nazir bildirib ki, bu yaxınlarda fövqəladə vəziyyət rejiminin uzadılması barədə qərar rəsmən qüvvəyə minəcək.

Qeyd edək ki, fövqəladə vəziyyət rejimi ötən ilin iyulun 21-də, hərbi çevrilişə cəhddən sonra tətbiq olunub. Fövqəladə vəziyyət rejimi bundan əvvəl 4-cü dəfə uzadılıb.

Xatırladaq ki, 2016-cı ilin 15 iyul tarixində İstanbul və Ankarada dövlət çevirlişinə cəhd olub. Cəhdin məqsədi Türkiyədə hakimiyyəti devirmək idi. Özünü Yurdda Sülh Konseyi adlandıran bir qrup Türk Silahlı Qüvvələrinin rəsmi internet saytı və TRT-də yayımlanan bildirişdə ordu idarəçiliyə əl qoyulduğunu bildirdi. Cəhdin qarşısı müvəffəqiyyətlə alınıb. Hadisəni Fətullahçı Terror Təşkilatının (FETÖ) təşkil etdiyi məlum oldu.

Ziya Səccad
Ölkə.Az