Hesablama Palatasından dövlət büdcəsinə rəy
Hesablama Palatasından "Ölkə.Az"a verilən məlumata görə, Dünya Bankının ötən ilin iyun ayında dərc etdiyi "Qlobal İqtisadi Perspektivlər" adlı nəşrində Azərbaycan üzrə cari ildə gözlənilən real artım tempinin -1,4%, 2018-ci ildə isə 0,6% təşkil edəcəyi proqnozlaşdırmışdı.
BVF-nin cari ilin oktyabr ayında dərc etdiyi “Dünya İqtisadi İcmalı”nda cari ildə ÜDM-in real artım tempinin (-1,0%), 2018-ci il üçün isə 1,3% nisbətində proqnozlaşdırılması öz əksini tapıb.
“Büdcə zərfi”nə daxil olan məlumatlardan göründüyü kimi, qarşıdakı ildə ÜDM-in həcmi 69395,4 mln.manat olmaqla 1,5% real artım tempilə proqnozlaşdırılıb. Neft sektorunda yaranan əlavə dəyərin həcmi qarşıdakı ildə 1,0% azalma, qeyri-neft sektoru üzrə 2,9% real artım tempi ilə proqnozlaşdırılıb.
Azərbaycanın Qanun layihəsində dövlət büdcəsinin gəlirləri 20127,0 mln. manat məbləğində proqnozlaşdırılıb. Bu, 2017-ci ilin təsdiq olunmuş proqnozu ilə müqayisədə 3361,0 milyon manat və ya 20,0%, 2016-cı ilin faktiki icra göstəricisi ilə müqayisədə 2621,2 milyon manat və ya 15,0% çoxdur. 2018-ci ildə dövlət büdcəsi gəlirlərinin ÜDM-ə nisbətinin 29,0% təşkil edəcəyi proqnozlaşdırılıb.
2018-ci il dövlət büdcəsinin xərcləri 20905,7 milyon manat məbləğində nəzərdə tutulub. Bu, 2017-ci illə müqayisədə 2964,7 milyon manat və ya 16,5%, 2016-cı ilin faktiki icrası ilə müqayisədə 3154,4 milyon manat və ya 17,8% çoxdur. Növbəti il üçün dövlət büdcəsinin xərclərinin ÜDM-də nisbətinin 30,1% təşkil edəcəyi proqnozlaşdırılıb.
