İraq vətəndaşının evindən oğurluq edən qadın yaxalandı

Səbail Rayon Polis İdarəsinin əməkdaşları rayon məhkəməsinin qərarı ilə axtarışda olan qadını yaxalayıb.

“Ölkə.Az”-ın xəbərinə görə Yasamal rayon qeydiyyatında olan, 1988-ci il təvəllüdlü Həsənova Jalə Ədalət qızı oğurluq maddəsi ilə axtarışda olduğuna görə, saxlanılıb.

Məlum olub ki, ötən ilin 20 iyun tarixində İraq Respublikasının vətəndaşı Mumas Əbdülhəmid Əbdülməqid Əl-Rübai polisə müraciət edərək bildirib ki, kirayə qaldığı M.Ə.Rəsulzadə küçəsi ev 2, mənzil 76-dan 5100 manat pulu və mobil telefonu oğurlanıb. Həmin gün evində qonaq qismində Həsənova Jalə Ədalət qızı və Babayeva Diana Borisovnanın iştirak etdiyini də qeyd edib.

Keçirilən tədbirlər nəticəsində hər iki adıçəkilən şəxs saxlanılıb və onlar barəsində Səbail RPİ-nin İstintaq Şöbəsində cinayət məcəlləsinin 177.2.1-ci (oğurluq) maddəsi ilə cinayət işi başlanıb.

Ancaq istintaq dövründə J.Həsənova xəstə olduğu, D.Babayevanın isə 3 azyaşlı uşağı olduğu üçün onlar barəsində həbs qətimkan tədbiri seçilməyib.

Cinayət işi baxılması üçün Səbail rayon məhkəməsinə göndərilib. J.Həsənova məhkəmə proseslərində iştirak etmədiyi üçün hakim tərəfindən onun barəsində axtarış elan edilib.