Kluninin müsəlman həyat yoldaşı Ermənistanı Avropa məhkəməsində təmsil edəcək

O, Culian Asanc, Yuliya Timoşenko kimi şəxslərin təmsilçisi olub.

Ölkə.Az xəbər verir ki, məşhur Hollivud aktyoru Corc Kluninin həyat yoldaşı Amal Ramzi Kluni (Alamuddin) Ermənistanı İnsan Haqları üzrə Avropa Məhkəməsində təmsil edəcək.

Bu barədə Amerikanın "Kaliforniya Kuryer" qəzetinin redaktoru Arut Sasuyan "Asbarez"-də yazıb.

Amal Alamuddin "Doğu Perinçek İsveçrəyə qarşı" işi üzrə Ermənistanı təmsil edəcək vəkillərdən biri olacaq. Sözügedən qalmaqallı məhkəmənin gələn ay baş tutacağı gözlənilir. Xatırladaq ki, elmlər dostoru "Türk fəhlə partiyasının" lideri Doğu Perinçek 2005-ci ildə İsveçrədə erməni soyqırımının "beynəlxalq yalan" olduğunu söylədiyi üçün irqi ayrı-seçkilikdə ittiham olunmuşdu.

Sasunyanın sözlərinə görə, Ermənistanı güclü vəkillərdən ibarət qrup təmsil edəcək. Vəkillər qrupunda Ceffri Robertsonla yanaşı, həm də onun həmkarı Amal Alamuddin da olacaq. Əslən Livan ərəbi olan Alamuddin bir çox beynəlxalq məhkəmələrdə vəkil qismində iştirak edib. O, Culian Asanc, Yuliya Timoşenko kimi şəxslərin təmsilçisi olub.

Bundan əlavə, Ermənistanın maraqlarını ölkənin baş prokuroru Emil Babayan və Avropa məhkəməsində səlahiyyətli nümayəndəsi Qevork Kostanyan müdafiə edəcək.

Məhkəmə iclası yanvarın 28-nə planlaşdırılıb.

Rəşid Mustafazadə

Ölkə.Az