Elman Abdullayev etimadnaməsini Efiopiya prezidentinə təqdim etdi

Azərbaycan Respublikasının Efiopiya Federativ Demokratik Respublikasındakı Fövqəladə və Səlahiyyətli səfiri Elman Abdullayev etimadnaməsini Efiopiya Federativ Demokratik Respublikasının prezidenti Mulatu Teşomeyə təqdim edib.

Azərbaycan XİN-in mətbuat xidmətindən Ölkə.Az-a daxil olan xəbərə görə, Efiopiya prezidenti ilə keçirilmiş görüşdə səfir Elman Abdullayev Azərbaycan Respublikasının Prezidenti İlham Əliyevin salamlarını Mulatu Teşomeyə çatdırıb. Azərbaycanın Afrika qitəsinin mühüm ölkələrindən biri olan Efiopiya ilə münasibətlərin inkişafında və bir sıra sahələrdə, o cümlədən iqtisadiyyat, humanitar, mədəniyyət və təhsil sahələrində əməkdaşlığın genişləndirilməsində maraqlı olduğunu qeyd edən Elman Abdullayev iki ölkə arasındakı münasibətlərin yeni müstəviyyəyə qaldırılması üçün böyük potensialın mövcud olduğunu bildirib.

Efiopiya Federativ Demokratik Respublikasının prezidenti Mulatu Teşome ölkəsinin Azərbaycanla münasibətlərin inkişafına böyük əhəmiyyət verdiyini, Azərbaycanın sürətli inkişafının ona böyük təəssürat bəxş etdiyini və Azərbaycanın onun üçün xüsusi əhəmiyyətə malik olduğunu qeyd eşdib. Efiopiya prezidenti Elman Abdullayevə fəaliyyətində uğurlar arzulayıb.

Görüşdə həmçinin, müxtəlif sahələrdə perspektiv əməkdaşlıq imkanları müzakirə olunub.