İŞİD koalisiya güclərinin qırıcısını vurdu

ABŞ-ın başçılığı altında İŞİD-ə qarşı hava bombardımanlarının davam etdiyi bir zamanda gündəmə düşən bu xəbər hər kəsi şoka salıb.

Ölkə.az Türkiyənin "Radikal" qəzetinə istinadən xəbər verir ki, İŞİD Rakkanı bombalayan kolalisyon qüvvələrinə aid bir qırıcı-bombardımançı təyyarəni vurub.

Məlumata görə, təyyarənin iordaniyalı pilotu katapultasiya edib və yerə endikdən sonra İŞİD döyüşçüləri onu əsir götürüblər.

Suriya İnsan Hüquqları Təşkilatı təyyarənin vurulması xəbəri təsdiq edib. Təyyarənin hansı dövlətə aid olduğu haqda məlumat verilmir.

Hadisədən sonra dünyanın bütün aparıcı media orqanları diqqəti İŞİD-in təyyarəni hansı silahla vurduğuna yönəldiblər.

Hadisənin detalları hələ açıqlanmır.

Xatırladırıq ki, Suriyanın Rakka şəhəri İŞİD-in paytaxtı sayılır və təşkilatın əsas hərbi qüvvələri birada cəmləşib.

Ölkə.az