"Azərbaycanda qida təhlükəsizliyinə dair heç bir qanun yoxdur"

"Nə qədər ki, istehlakçı arxa plana çəkilir, istehsalçı biznes dəstəklənir vətəndaşların həyatı təhlükədə olmaqda davam edəcək"

“Kristal CF” əmtəə nişanlı kolbasanın tərkibində donuz əti və piyi aşkar edilməsinin ardınca, daha bir rəzalət baş verib. Xəbər verdiyimiz kimi dönər hazırlanmasında ölmüş heyvan ətindən istifadə faktları aşkarlanıb.

Baş verən hadisə ölkənin qida sektorunun ciddi təhlükədə olduğundan xəbər verir.

Mövzu ilə əlaqədar Ölkə.az-a danışan AİB sədri ard-arda baş verən hadisələri təhlükəli statistika adlandırıb.

"Ölkədə qidanın təhlükəsizliyinə dair hər hansı bir qanun yoxdur. Təhlükəli qidanın qarşısını almağa heç bir dövlət qurumunun operativ müdaxilə etmək hüququna sahib deyil. Nə qədər ki, istehlakçı arxa plana çəkilir, istehsalçı biznes dəstəklənir vətəndaşların həyatı təhlükədə olmaqda davam edəcək. Son zamanlar ard-arda baş verən hadisələr bu mövzuda ciddi dəyişikliklərin edilməsindən xəbər verir".

Qeyd edək ki, ölkədə ölmüş heyvanların ətindən dönərdə istifadə edildiyi barədə faktlar aşkarlanıb və artıq bununla bağlı monitorinqə start verilib.

Fatimə İbrahimova
Ölkə.az