Deputatdan təklif

 “ Demək olar ki, parlamentin əksər komitələrində müzakirə edilən qanun layihələri yaz sessiyasının qanunvericilik işləri planına daxil edilib”.

“Ölkə.Az” xəbər verir ki, bunu Milli Məclisdə çıxışı zamanı deputat Elmira Axundova deyib.

Deputat bildirib ki, yaz sessiyasının qanunvericilik işləri planına təklifi var:
“Xirdalan və Abşeronda kənd təsərrüfatı kateqoriyasına aid olan torpaqlarda uzun illərdir ki, fərdi evlər inşa edilib. Burada insanlar illərdir ki yaşayır, övladlarına xeyir işlər edir, vəfat edənlər olur. Eyni zamanda burada ev inşası qanunsuz olsa da, fərdi evlər kommunal və rabitə xidmətlərindən istifadə edir, vergi ödəyirlər. Bu evlərin çoxuna bələdiyyə və ya icra hakimiyyətləri sənədlər verib. Ancaq bu torpaqlar kənd təsərrüfatı təyinatlı olduğuna görə, evlərə çıxarış əldə edə bilmirlər.

Məncə, bu torpaqların təyinatı dəyişdirilsə və yaşayış torpaqları kimi qeydə alınsa, yaxşı olardı. Çünki bu artıq sosial problem halına gəlib. Minlərlə insan uzun illərdir ki, bu ərazidə inşa etdiyi evlərdə yaşayır. Qanunsuz olsa da, insanlar uzun illərdir ki, burada yaşayırlar. Hesab edirəm ki, Torpaq Məcəlləsində və ya müvafiq qanunda dəyişiklik edilməsinə yaz sessiyası dövründə baxılmalıdır. Yox, əgər bu məsələ Nazirlər Kabinetinin səlahiyyətindədirsə, onlar buna diqqət etməlidirlər”.

Vasif Həsənli
Ölkə.Az