Abşeronda quldur dəstəsi taksi sürücüsünü soydu
Abşeron RPİ əməkdaşlarının keçirdikləri əməliyyat-axtarış tədbirləri nəticəsində yanvarın 30-da paytaxt sakini Elxan Veysova qarşı quldurluq edən dəstə üzvləri saxlanılıb.
“Ölkə.Az”-ın məlumatına görə, 3 nəfər Bakıdan müştəri qismində E.Veysova məxsus taksiyə oturaraq Xırdalana gəliblər. Ancaq mənzil başına çatanda Xırdalan şəhər sakini, əvvəllər məhkum olunmuş Tərlan Şahkərimov, Quba rayon sakinləri Murad Əşrəfov və Elvin Babayev taksi sürücüsünün pulunu vermək əvəzinə onun 30 manat pulunu və mobil telefonunu quldurluq yolu ilə əldə edərək ərazini tərk ediblər.
Keçirilən əməliyyat-axtarış tədbirləri tezliklə öz nəticəsini verib və dəstə üzvləri saxlanılıb. Faktla bağlı Abşeron rayon Polis İdarəsində cinayət məcəlləsinin 181-ci (quldurluq) maddəsi ilə işi başlanıb. Dəstə üzvlərinin oxşar cinayətlər törətməsi istisna edilmir.
