Ölümə səbəb olan avtobus sürücüsü saxlanıldı

Fevralın 2-si saat 07:00 radələrində Bakı şəhəri, Binəqədi rayonu, A.Məmmədov küçəsində yolu keçən 55-60 yaşlı kişi müəyyən edilməmiş avtomobillə vurulub və nəticədə hadisə yerində ölüb.

Daxili İşlər Nazirliyinin (DİN) Mətbuat xidmətindən "Ölkə.Az"-a verilən xəbərə görə, Binəqədi Rayon Polis İdarəsi 7-ci Polis Bölməsinin əməkdaşlarının keçirdikləri təxirəsalınmaz əməliyyat-axtarış tədbirləri nəticəsində ölən şəxsin paytaxt sakini Məsim Həsənov olması, hadisənin isə “Isuzu” markalı avtobusla törədildiyi müəyyən edilib.

Görülmüş tədbirlərlə hadisə yerindən qaçan həmin xətt avtobusunun sürücüsü - Bakı şəhər sakini Ramiz Kərimov saxlanılaraq istintaqa cəlb olunub.
Faktla bağlı Binəqədi RPİ-nin İstintaq Şöbəsində cinayət məcəlləsinin 263.2 və 264-cü cinayət işi başlanılıb, araşdırma aparılır.

Ölkə.Az