Gecə klubundan çıxan gənci qarət edənlərin məhkəməsi

Bakıda gecə klubundan çıxan gəncə qarşı quldurluq etməkdə təqsirləndirilən Vahid Şirinov və Rəşad Məhərrəmovun apellyasiya şikayəti üzrə məhkəmə prosesi başa çatıb.

"Ölkə.Az" xəbər verir ki, bu gün Bakı Apellyasiya Məhkəməsində hakim Qail Məmmədovun sədrliyi ilə keçirilən prosesdə qərar elan olunub.

Qərara görə, hər iki təqsirləndirilən şəxsin apellyasiya şikayəti təmin edilməyib.

Bakı Ağır Cinayətlər Məhkəməsinin hökmü ilə Vahid Şirinov 6 il, Rəşad Məhərrəmov isə 5 il müddətinə azadlıqdan məhrum edilib.

Hökmdən narazı qalan təqsirləndirilən şəxslər apellyasiya şikayəti veriblər. Onlar barələrində həbs olmayan cəza növünün tətbiq edilməsini istəyiblər.
İttihama görə, ötən ilin mayın 17-də Nizami rayonunun Keşlə qəsəbəsində təqsirləndirilən şəxslər qəsəbə sakini Vasif Namazovu küt alətlə hədələyərək 800 manatını alıblar.

İstintaq müəyyən edib ki, Vahid Şirinov və Rəşad Məhərrəmov birlikdə gecə klubunda istirahət edən zaman Vasif Namazovun ofisianta hesab verdiyini görüblər.

Vasif Namazov pulu cibindən çıxaranda Rəşad Məhərrəmov onda xeyli pul olduğunu müşahidə edib.

Rəşadla Vahid sonra həmin şəxsi qarət etməyi palanlaşdırıblar. Keşlədəki avtoyuma məntəqələrindən birində yuyucu işləyən Vahid Şirinov və Rəşad Vasifə yaxınlaşıblar. Gecə yarısı küçədə Vasifin qarşısını kəsən quldurlar, onun pulunu alaraq qaçıblar.

Təqsirləndirilən Rəşad Məhərrəmov hadisəyə belə aydınlıq gətirib: “Klubdan çıxanda Vasifdən 20 manat istədim. İçkili idim, dedim, borca 20 manat ver. Onu tanıyırdım, “Avromed”də işləyir. Dedi ki, problem yoxdur, gedək dükana, verim. Marketə girdik. Siqaret aldı və çıxanda gördüm ki, pul vermək istəmir. Əlimi saldım cibinə, pulu götürdüm. Götürdüyüm pul məndə olub. Onun cibində cəmi 450 manat olub. Vahidə 5 manat verdim. Dedim ki, cibindən 10 manat çıxdı”.

Zərərçəkmişin pulunu götürən Rəşad yaşadığı Fizuli rayonuna qaçdığını, bir neçə gündən sonra həbs edildiyini deyib.

Digər təqsirləndirilən Vahid Şirinov törətdiyi əməli etiraf etməyib. O, quldurluq cinayəti törətmədiyini iddia edib.

Təqsirləndirilən şəxslər Cinayət Məcəlləsinin 181.2.5-ci (quldurluq, silah və silah qismində istifadə edilən əşyalar tətbiq edilməklə törəldildikdə) maddəsi ilə ittiham olunub.