Poliklinikanın baş həkimi rüşvət verdiyini etiraf edib

“Ölkə.Az”ın məlumatına görə, bu gün Bakı Ağır Cinayətlər Məhkəməsində hakim Mahmud Ağalarovun sədrliyi ilə baş tutan prosesdə zərərçəkmiş Ramidə İbrahimova ifadə verib. 

O, bildirib ki, Bakıda poliknikaların birində baş həkim işləyib: “Təqsirləndirilən Hikmət Nəcəfli mənə zəng edərək görüşmək istədi. Mən isə onunla görüşmədim. Qəzetlərində mənim haqda yazılar yazıldı. Sonra Səhiyyə Nazirliyindən yoxlama aparıldı. Mən bununla bağlı “Nəşriyyat”a getdim. Orada Hikmət müəllim məni qarşıladı. Əvvəl məndən 2000 manat istədi, 500 manat  verdim. Dedim ki, həyat yoldaşın üçün hədiyyə alarsan. Bir qədər keçəndən sonra adımdan yenə yazılar getdi. Buna görə isə 200 manat verdim”.

Daha sonra zərərçəkmiş şəxs qismində Respublika Turizm və Ekskursiyalar üzrə Şurasının sədri Fikrət Nuriyev, Xırdalandakı dövlət baxçasının müdirəsi Könül İbrahimova ifadə veriblər. Onlar təqsirləndirilən şəxslər tərəfindən şantaj olunduqlarını bildiriblər. 

Növbəti proses martın 1-də davam edəcək. 

İttihama görə, ölkədə insanları şantaj edən media orqanları rəhbərləri və əməkdaşları ilə bağlı Dövlət Təhlükəsizlik Xidməti tərəfindən aparılan istintaq-əməliyyat tədbirləri çərçivəsində cinayəti başlanıb.

Aparılan araşdırmalarla "Bizim dövr” qəzetinin baş redaktoru Surxay Əliyev və müavini Hikmət Nəcəfli də həbs olunub.

İstintaq araşdırması zamanı digər təqsirləndirilən Gülbəniz Əliyeva, İlahə Qasımova, Sevinc Məmmədsalayeva və Maarif Abbasovun Surxay Əliyevlə cinayət əlaqəsinə girdikləri məlum olub. Sevinc Məmmədsalayeva isə daha əvvəl hədə-qorxu ilə tələb etmədə təqsirləndirilərək 6 il müddətinə azadlıqdan məhrum edilib. O, hazırda 4 saylı cəzaçəkmə müəssisəsində cəza çəkir.

Ölkə.Az