Aydın Əhmədov: “Biz gənclərin səsi o fevral gecəsi səslənən səslərə qoşulacaq”
“Ölkə.Az” xəbər verir ki, bu fikirləri Yeni Azərbaycan Partiyası (YAP) Suraxanı rayon təşkilatının fəal gənci, “Euro Fight” kikboksinq idman klubunun prezidenti Aydın Əhmədov 20-ci əsrin ən dəhşətli hadisəsi – Xocalı soyqırımının 26-cı ildönümünə münasibətini bildirərkən deyib. Onun sözlərinə görə, Azərbaycan gəncləri daim dünyanın müxtəlif ölkələrində yaşayan həmyaşıdlarımıza, müxtəlif hökumət orqanlarında, ictimai təşkilatlarda, beynəlxalq qurumlarda, kütləvi informasiya vasitələrində çalışan və fəaliyyət göstərən həmkarlarımıza və ədalətin pozulmasına qarşı çıxanlara müraciət edərək etiraz səsimizə səs verməyə çağırıblar və bu ənənə şəklini alıb: “Hesab edirik ki, biz gənclərin səsi o fevral gecəsi səslənən səslərə qoşulacaq, hələ də girovluqda olan, lakin fiziki varlığı hər vəchlə gizlədilən ən azı bir kəsin bəlkə də azad olaraq insan kimi yaşamasına təkan verəcəkdir”.
Gənc fəal həmçinin xatırladıb ki, “Xocalıya ədalət” beynəlxalq maarifləndirmə kampaniyasına Heydər Əliyev Fondunun vitse-prezidenti Leyla xanım Əliyevanın təşəbbüsü ilə 2008-ci ildə start verilmişdi və bu kampaniyanın başlanması Vətənini sevən hər bir Azərbaycan gəncinə müəyyən öhdəliklər verir: “Əbəs deyil ki, məhz bu kampaniya Xocalı soyqırımı, Ermənistan-Azərbaycan, Dağlıq Qarabağ münaqişəsinin tarixi səbəbləri və nəticələri, həmçinin Ermənistan silahlı qüvvələrinin Azərbaycanın işğal olunmuş Dağlıq Qarabağ regionu və digər ərazilərindən qeyd-şərtsiz və dərhal çıxarılmasının zəruriliyi ilə bağlı beynəlxalq maarifləndirmənin artırılması məqsədini daşımaqla yanaşı, bütün dünyaya səs saldı. Artıq bu gün, dünyanın bir çox ölkələri, eləcə də ABŞ-ın 21 ştatı Xocalı soyqırımını tanıdıqlarını bəyan ediblər. Eyni zamanda gənclərimiz öz müraciətlərini beynəlxalq aləmə çatdırmaq üçün müxtəlif kommunikasiya vasitələri və resurslarından, o cümlədən media, internet və canlı tədbirlərdən fəal şəkildə istifadə edirlər”.
Aydın Əhmədov sonda bildirib ki, erməni işğalı altında qalan Qarabağ ərazilərimiz də tezliklə düşmən tapdağından azad olunacaq: “Biz, Aprel müharibəsində Ordumuzun zəfərini gördük və gənc olaraq, bu zəfərlərimizin davamlı olacağına əminik. Xocalı soyqırımı xalqımızın qan yaddaşı olaraq, bizlərin xatirəsində daim əbədi qalacaq” .
