“1993-cü ilədək bütün idman kompleksləri və stadionları ticarət obyektinə çevrilmişdi”

Bu fikirləri “Ölkə.Az”a açıqlamasında Azərbaycan Dövlət Bədən Tərbiyəsi və İdman Akademiyası rektorunun müşaviri, Yeni Azərbaycan Partiyası (YAP) Respublika Gənclər Birliyinin İdarə Heyətinin üzvü, professor Yusif Babanlı 5 mart - Bədən Tərbiyəsi və İdman Günü ilə bağlı danışarkən bildirib.

Yusif Babanlı deyib ki, prezident İlham Əliyev Azərbaycan Milli Olimpiya Komitəsinin sədri olandan sonra Azərbaycan idman ən yüksək zirvəsinə ucalıb:

“Azərbaycan idmanının inkişafı 1993-cü ildə ulu öndər Heydər Əliyev Azərbaycanda hakimiyyətə gələndən sonra başlayıb. Ulu Öndərin layiqli davamçısı olan cənab prezident İlham Əliyev isə hər zaman Azərbaycan idmançılarının yanında olub. Ötən illər ərzində Azərbaycan mötəbər idman tədbirləri yüksək səviyyədə təşkil olunub. Azərbaycan idmançıları beynəlxalq idman yarışlarında qələbə qazanaraq, Azərbaycan bayrağını göylərə qaldırıb. Son illər isə Azərbaycan dünyada idman ölkəsi kimi tanınmağa başlayıb. Azərbaycan ilk Avropa Oyunlarına, İslam Oyunlarına və digər beynəlxalq və mötəbər idman yarışlarına ev sahibliyi edib. Bütün bunlar Azərbaycan dövlətinin dünyada nüfuzunun artmasından və sürətli inkişafından xəbər verir. Təbii ki, idman sahəsində əldə etdiyimiz bu cür uğurlar cənab prezident İlham Əliyevin Azərbaycanda idmana və idmançılara göstərdiyi böyük diqqət və qayğının nəticəsində mümkün olub.

Mən fürsətdən istifadə edib, 5 mart - Bədən Tərbiyəsi və İdman Günü münasibətilə başda cənab prezident İlham Əliyev və Birinci vitse-prezident Mehriban xanım Əliyeva olmaqla, bütün idman ictimaiyyətini təbrik edirəm. Onlara gələcək fəaliyyətlərində böyük uğurlar arzu edirəm”.

Rektorun müşaviri qeyd edib ki, Azərbaycan idmançıları hər zaman olduğu kimi, bundan sonra da prezident İlham Əliyevin ətrafında olacaq:

“Hər zaman olduğu kimi, qarşıdan gələn seçkilərdə də Azərbaycan idmançıları cənab prezident İlham Əliyevi dəstəkləyir. Çünki cənab İlham Əliyevin prezidentliyi dövründə Azərbaycan idmanı və idmançıları dünyada tanınır, böyük uğurlara imza atıb”.

Vasif Həsənli

Ölkə.Az