Əmisi oğlunu içki məclisindən sonra öldürdü

“Ölkə.Az” xəbər verir ki, bu gün Bakı Ağır Cinayətlər Məhkəməsində hakim Mayıl Bayramovun sədrliyi ilə baş tutan prosesdə prokuror ittiham aktının elan edib.

İttihama görə, Rəşad İsgəndərov Xəzər rayonunun Türkan qəsəbəsində birlikdə fəhlə işlədiyi əmisi oğlu, 1988-ci il təvəllüdlü Pərviz İsgəndərovu ürək nahiyəsindən bıçaqlayaraq öldürüb.

Məlum olub ki, əmioğlanları arasında hadisənin baş verməsinə səbəb söyüş olub. Hər iki əmioğlu spirtli içkinin təsirindən bir birini söyüblər. Bundan sonda Rəşad İsgəndərov əmisi oğlunu öldürüb. 

İstintaq orqanı tərəfindən Rəşad İsgəndərova qarşı Cinayət Məcəlləsinin 120.1-ci (qəsdən adam öldürmə) maddəsi ilə ittiham elan edilib. 
İttihama münasibət bildirən Rəşad İsgəndərov özünü ittiham üzrə tam təqsirli bilib. O, bildirib ki, yaşadıqları Şəki rayonundan işləmək məqsədilə əmisi oğlu Pərviz ilə birlikdə paytaxta gəlib. 

Təqsirləndirilən şəxsin sözlərinə görə, paytaxtda əmisi oğlu ilə birlikdə fəhləlik edərək pul qazanıblar: 
“Fəhləlik edib, ailəmizi dolandırırdıq. Hadisə baş verən günü nahar fasiləsində Pərvizlə spirtli içki içdik. İçkinin təsirindən hər ikimiz sərxoş olduq. Bu zaman aramızda mübahisə düşdü. Mübahisəyə səbəb Pərvizin mənə “mənim sənə çox xeyrim dəyib” ifadəsini işlətməsi olub. Həm də mənə qarşı söyüş söydü. Nar doğramaq üçün götürdüyüm bıçaqla onu vurdum”.

Rəşad İsgəndərov qeyd edib ki, əmisi oğlunu vuran zaman özündə olmayıb: “Pərvizi vurandan sonra birdən özümə gəldim. Tez yaxınlıqda olan Füzuliyə dedim ki, təcili yardım çağırsın. Təcili yardım gələnə kimi Pərviz öldü”. 

Polislər tərəfindən həmin vaxt saxlanıldığını deyən Rəşad İsgəndərov əməlindən peşman olduğunu bildirib. 

Daha sonra ifadə verən zərərçəkmiş şəxsin hüquqi varisi Məzahir İsgəndərov bildirib ki, hadisə zamanı ölən Pərviz oğlu olub. O, oğlunu öldürən qardaşı oğlunun bağışladığını, ondan şikayətçi olmadığını deyib. 

Növbəti proses martın 29-da davam edəcək.