Keçmiş MTN polkovniki hakimdən vaxt istədi
“Ölkə.Az” xəbər verir ki, bu gün Bakı Ağır Cinayətlər Məhkəməsində hakim Rahib Salmanovun sədrliyi ilə baş tutan prosesdə Vüqar Güləli son sözlə yenə vaxt istəyib.
O qeyd edib ki, zərərçəkmişlərlə söhbət gedir, real məsələlər var.
“Bizə ödəniş etmək üçün bir az zaman verin. Olmasa demərəm, sizi aldatmıram”, - deyə sabiq MTN polkovniki hakimlərə üz tutaraq deyib.
Zərərçəkmiş şəxs bildirib ki, Vüqar Güləli yenə hamını aldadır:
“4 ildir nə deyirsə, indi də deyir. Onun sözünə inanmıram. Onun uşaqlarına yazığım gəlir”.
Hakim bildirib ki, sonuncu dəfə Vüqar Güləliyə son sözə vaxt verilir.
Növbəti proses aprelin 13-də davam edəcək.
Qeyd edək ki, prokuror Vüqar Güləlinin 9 il 6 ay, Nicat Əliyevin 8 il 6 ay, Ceyhun İbayevin 8 il, Vüqar Əsədovun 7 il 6 ay, Anar İsmayılovun 3 il müddətinə azadlıqdan məhrum edilməsini təklif edib.
İttihama görə, Ceyhun İbayev, Vüqar Əsədov, Vüqar Güləli, Anar İsmayılov və Nicat Əliyev bir qrup vətəndaşın etibarından sui-istifadə edərək, onlara qarşı dələduzluq edib.
Həmin şəxslər zərərçəkmiş Səriyyə Tahirovanın həyat yoldaşını həbsdən azad edəcəkləri vədi ilə qadının 147 min manat pulunu ələ keçiriblər.
Cinayət Məcəlləsinin 178.3.2-ci (dələduzluq; külli miqdarda törəldildikdə) maddəsi ilə ittiham olunan təqsirləndirilən şəxslər digər vətəndaşlara qarşı da dələduzluq ediblər.
Onlar iranlı məhkumların İrana ekstradisiya edilməsi üçün pul lazım olduğunu, qarşılığında isə 1 milyon dollar pul qazanacaqlarını, əldə edilən puldan onlara da pay verəcəkləri vədi ilə Aybala Namazovdan 35 min manat, Ədalət Əsgərovdan 115 min alaraq qaytarmayıblar.
Cinayət işində çoxsaylı zərərçəkmiş var.
Xatırladaq ki, Vüqar Güləliyev ləğv edilmiş Milli Təhlükəsizlik Nazirliyinin (MTN) təqaüddə olan polkovnikidir.
