"Green House" istirahət mərkəzində ölənlərin ailə üzvləri məhkəməyə müraciət etdi

İddiaçılar Adıgözəlova Kübra Maarif qızı və Quliyeva İlhamə Şahmar qızı “Nyu Sfera Turizm” MMC-yə qarşı maddi və mənəvi zərərin ödənilməsi tələbi ilə Bakı Apellyasiya Məhkəməsinə müraciət ediblər. Nizami rayon məhkəməsində iddiaçıların şikayəti qismən təmin edildiyindən onlar yenidən məhkəməyə şikayət vermək qərarına gəliblər.

”Ölkə.Az”ın məlumatına görə, mart ayının 29-da Bakı Apellyasiya Məhkəməsində hakim Tofiq Səmədovun sədrliyi ilə apellyasiya şikayətinə baxılacaq.

Xatırladaq ki, ötən ilin iyul ayında İsmayıllıda yerləşən "Green House" istirahət mərkəzində faciəvi hadisə baş verib. Sözügedən məkanın hovuzunda 4 nəfəri elektrik cərəyanı vurub. Nəticədə Adıgözəlova Kübra Maarif qızı və Quliyeva İlhamə Şahmar qızının ailə üzvləri, Bakı şəhər Binəqədi rayon sakini, 1984-cü il təvəllüdlü Emin Zakir oğlu Adıgözəlov , Abşeron rayonu Xırdalan qəsəbə sakini, 1979-cu il təvəllüdlü Gülhüseyn Xaliqverdi oğlu Quliyev dünyasını dəyişib. Zaqatala rayon sakini 1981-ci il təvəllüdlü Eltəkin Məhəddin oğlu Ömərov və Bakı şəhəri Nizami rayon sakini, 1986-cı il təvəllüdlü Zakir Mahir oğlu Əliyev isə xəstəxanaya çatdırılıb. Xəstəxanada müalicə olunan şəxslərin həyatını xilas etmək mümkün olub.
“Hələ ki, istintaq davam edir. Yalnız ondan sonra hadisənin hansı səbəbdən baş verdiyi aydınlaşacaq. İki nəfər hovuzda çimirmiş, digər iki şəxs də onları xilas etmək istəyərkən zərər çəkib. "Green House" 15 ilə yaxındır ki, fəaliyyət göstərir. İstirahət mərkəzinin rəhbərliyi haqqında isə məlumatım yoxdur”, - deyə baş verən facilə ilə bağlı rayon icra hakimiyyətinin müavini bildirmişdi.
Araşdırmalar nəticəsində məlum olub ki, “Green House” istirahət mərkəzi “Nyu Sfera-Turizm” MMC-yə məxsusdur. “Nyu Sfera-Turizm” şirkəti “Nyu Sfera” şirkətlər qrupuna daxildir. Şirkətlər qrupunun prezidenti İman Quliyevdir. El arasında biznesmen kimi tanınan İman Quliyev eyni zamanda “Xalqlar Dostluğu” yarmarkasının sahibidir.