Tağı İbrahimovun keçmiş şərikinin ölkədən çıxışına qadağa qoyuldu

Nərimanov rayon məhkəməsinin qərarı ilə məşhur tikinti şirkətinin rəhbərinin ölkədən çıxışına qadağa qoyulub.

“Ölkə.Az”ın məlumatına görə, Nərimanov Rayon İcra Şöbəsinin təqdimatı əsasında “Fəqan-1” MMC-nin direktoru Hüseynov Rauf Ağacəfər oğlunun ölkədən getmək hüququ müvəqqəti məhdudlaşdırılıb.

Qərardan narazı qalan MMC rəhbəri Bakı Apellyasiya Məhkəməsinə müraciət edib. Mart ayının 28-də hakim Namiq Cəfərovun sədrliyi ilə R.Hüseynovun şikayətinə baxılacaq.

Xatırladaq ki, Rauf Hüseynov 2002-ci ildən tikinti biznesi ilə məşğuldur. Rəhbəri olduğu “Fəqan-1” MMC Nazim Ibrahimov və qardaşlarına məxsus olan “Nehrəm Holdinq”lə şərik olub. R.Hüseynovun dələduzluq əməlləri barəsində dəfələrlə vətəndaşlar tərəfindən Nərimanov RPİ-nə şikayətlər daxil olsa da, MMC direktorunun törətdiyi müdhiş dələduzluq əməlləri “alqı-satqı mübahisəsi” kimi dəyərləndirib və faktla bağlı cinayət işinin başlanması rədd edilib. Vətəndaşlarla MMC rəhbəri arasındakı mübahisə mülki iş kimi qiymətləndirilərək Nərimanov rayon məhkəməsinə göndərilib.