Bakıda tıxac yarandı

Bu gün paytaxtın bəzi küçə və prospektlərində avtomobillərin sıxlığı müşahidə edilib.

“Ölkə.Az” xəbər verir ki, tıxac nəticəsində uzun maşın karvanları yaranıb.

Bakı Şəhər Polis İdarəsinin Yol hərəkəti təhlükəsizliyinin təbliği və ictimai qurumlarla əlaqə bölməsinin rəisi, polis polkovniki Vaqif Əsədov yaranan tıxacın bir sıra küçə və prospektlərdə aparılan təmir işləri ilə əlaqədar olduğunu bildirib.

"Hazırda Bakı şəhəri ərazisindəki küçə və prospektlərdə əsaslı təmir və yenidənqurma işləri aparılır. Babək prospektində aparılan təmir işləri ilə bağlı artıq bir müddətdir yol birtərəfli istifadə olunur.

Bundan başqa, Nərimanov rayonu ərazisindəki küçə və prospektlərdə yollara asfalt örtüyü döşənir və təmir işləri aparılır. İdman oyunları ilə əlaqədar şəhərin Səməd Vurğun, Üzeyir Hacıbəyli və Xəqani küçələrində yolların asfalt örtüyü yenilənir və təmir işləri aparılır. Bu səbəbdən də yalnız səhər saatlarında sözügedən küçə və prospektlərdə, eyni zamanda bu küçələrə birləşən yollarda nəqliyyatın hərəkəti müəyyən qədər çətinləşir və tıxac əmələ gəlir. Günün digər saatlarında isə Bakı şəhəri ərazisində tıxac müşahidə edilmir".

Hikmət Həsənov
Ölkə.Az