Kriminal avtoritetin qardaşını öldürənin məhkəməsi

“Ölkə.Az”a verilən məlumata görə, aprel ayının 5-də Ali Məhkəmədə hakim İnqilab Nəsirovun sədrliyi ilə M.Quluzadənin şikayətinə baxılacaq.  
Xatırladaq ki, “Piter Elçin”in 1979-cu il təvəllüdlü qardaşı Fariz İsmayılov 2016-cı il dekabrın 21-də Masallı rayonunun Türkoba kəndi yaxınlığında öz avtomobilində qətlə yetirilib.

4 qardaş olan İsmayılovlardan artıq ikisi kriminal aləmdəki hesablaşmaların qurbanı olub. Qardaşlardan yalnız “Piter Elçin” kriminal aləmdə söz sahibi olsa da, hesablaşmaların qurbanları onun qardaşları olub.

Belə ki, ilk olaraq onun qardaşlarından Marif ötən ilin iyununda Sant-Peterburqun əsasən azərbaycanlıların nəzarətində olan Sofiysk meyvə-tərəvəz bazarında güllələnərək qətlə yetirilib. 6 ay keçməmiş isə Fariz İsmayılov güllələnib. “Piter Elçin”dən başqa sağ qalan digər qardaş isə xəstəlikdən əziyyət çəkir və hazırda doğulduğu Lənkəran rayon Boladi kəndində yaşayır.

Qətlə yetirilən hər iki qardaş ticarətlə məşğul olub. Onların kriminal aləmlə əlaqəsinin olmadığı məlum idi. Maarif meyvə-tərəvəz bazarında öldürülüb. Fariz isə 2012-ci ildən Azərbaycanda olub. Hər ikisi öz işləri ilə məşğul idi. Fariz Lənkəranda özünün və qardaşlarının ailəsinə baxırdı. Bu qətlləri isə “Piter Elçin”lə düşmənçiliyi olan şəxslər sifariş verib. Ona yaxın düşə bilməyənlər qardaşlarını öldürüblər. Maarif və Fariz kriminal aləmdən uzaq insanlar olub. 
Sonuncu qətlin təfərrüatlarına gəlincə, qətli törətdiyini deyən Lənkəran sakini, 1993-cü il təvəllüdlü Murad Quluzadə könüllü olaraq polisə təslim olub. O, cinayəti törətdiyi İsrail istehsalı olan "UZİ" markalı avtomat tapançanı və 7 ədəd gülləni polisə təhvil verib. Hadisə yerindən isə 25 ədəd giliz tapılıb. 
Cinayətin törədildiyi yer Fariz İsmayılovun yaşadığı kənddən bir neçə kilometr aralıda yerləşir.

Hər şey dörd il əvvəl, Elçin İsmayılovun Rusiyada Məzahim Daşdəmir oğlu Quluzadənin oğlunun qətlini sifariş etməsindən başlayıb. Mərhum, ötən gün Fariz İsmayılovu qətlə yetirən Muraq Quluzadənin əmisi oğlu olub. İsmayılovlarla Quluzadələr arasındakı münaqişə tərəvəz bazaları sahəsinə nəzarət və pul gəlirlərinin bölüşdürülməsi üstündə başlayıb. 

Faktla bağlı Masallı rayon prokurorluğunda cinayət məcəlləsinin 120.1 (qəsdən adam öldürmə) maddəsi ilə cinayət işi başlanıb.