"Alman deputatın “qara siyahıya” salınması hər kəs tərəfindən normal qarşılanmalıdır"

Almaniya Bundestaqının üzvü, Xristian-Demokrat Partiyasından olan deputat Manfrend Qrund Azərbaycanın “qara siyahı”sına daxil edilib.

Xatırladırıq ki, bu yaxınlarda Azərbaycanın Ermənistan tərəfindən işğal olunmuş ərazilərinə Bakıdan icazəsiz səfər edən və Dağlıq Qarabağdakı separatçı rejimin nümayəndələri ilə görüşlər keçirən M. Qrund Azərbaycan qanunlarına və beynəlxalq hüquq normalarına hörmətsizlik edib.

Bu məsələni millət vəkili Zahid Oruc Ölkə.az-a şərh edib.

“Əslində Xarici İşlər Nazirliyi tərəfindən qara siyahıların tərtib olunması, ora daxil olan şəxslərin sayının artması, məhz elə bir sənədin tərtibatında nazirliyin maraqlı olması fikri çox yalnışdır. Ayrı-ayrı beynəlxalq dairələr çalışırlar vəziyyəti çox sadələşdirib təqdimatlar versinlər ki, biz bu qanunsuz addıma dözüm göstərək və onu anlayışla qarşılayaq. Bir ölkə olaraq, tanınmış ərazi bütövlüyü çərçivəsində bu gün torpaqlarımızın işğal altında olan hissəsinə hər hansı bir səfərlərin edilməsinə icazə istənilir və bu çox normal bir hüquqi tələbdir. Necə ki, Almaniyanın sərhədlərinə, yaxud da hava məkanına kənar təsirlər olursa, avtomatik kəskin reaksiyalar verilir, eləcə də Azərbaycan belə edir.

Biz Qarabağ məsələsi ilə bağlı həssaslığımızı dünyaya tanıtdırmağa çalışırıq. Biz deyirik ki, orada beynəlxalq hüquq subyekti adına bir dövlət yoxdur. Buna görə də, parlament üzvləri nəzərə almalıdırlar ki, öz ölkələrini təmsil edirlər və bu adda həyata keçirilmiş səfərləri müstəqil bir ölkəyə edilmiş səfər kimi qələmə verir. Bizim dövlətin mövqeyi kimlərsə tərəfindən nəzərə alınmayacaqsa onlara qarşı siyasi sanksiyalar tətbiq edilməlidir. Biz çox arzulayırıq ki, işğal olunmuş ərazilər haqda qanun qəbul olunsun. Qanun qəbul olunmadığı üçün nazirlik tərəfindən belə siyahıların tərtib olunması və həmin şəxslərin "arzuolumaz şəxs" kimi qəbul olunması çox normal bir mövqedir”.

Səxavət Məmməd

Ölkə.az