İşə düzəltmək adı ilə əməkdar müəllimə qarşı dələduzluq

Azərbaycan Respublikasının əməkdar müəllimi olan Kazımov Afət Kazım qızı dələduzluq əməli ilə üzləşib.

“Ölkə.Az”ın məlumatına görə, A.Kazımova Həsənov Vuqar Hicran oğluna qızını Xarici İşlər Nazirliyinin kargüzarlıq şöbəsinə işə düzəltmək adı ilə 6000 manat pul verib. Guya V.Həsənovanın nişanlısının atası XİN-də işləyir və işi də həmin şəxs həll edəcək. Ancaq bir müddət keçməsinə baxmayaraq, nə iş düzəlib, nə də pul qayıdıb.

Nəsimi RPİ-nə şikayət edən A.Kazımovanın ərizəsi əsasında V.Həsənova qarşı cinayət məcəlləsinin 178.2.2-ci (dələduzluq) maddəsi ilə cinayət işi başlanıb və istintaq dövründə polis nəzarəti altına vermə qətimkan tədbiri seçilib. İstintaq dövründə V.Həsənov aldığı pulun bir hissəsini zərərçəkmişə qaytarıb. İstintaq bitdikdən sonra cinayət işi baxılması üçün Nəsimi Rayon Məhkəməsinə göndərilib. Hakim Elman İsayevin sədrliyi ilə keçirilən məhkəmə prosesində dəymiş ziyan tam ödənilib və zərərçəkmiş barışıq ərizəsini hakimə təqdim edib.

Qeyd edək ki, zərəçəkmiş Afət Kazımova Milli Konservatoriya və İncəsənət Universitetində müəllim işləyir. 2008-ci ildə isə Afət Kazımova musiqi təhsilinin inkişafındakı xidmətlərinə görə "Azərbaycan Respublikasının əməkdar müəllimi" adına layiq görülüb.