Nüşabə Ələsgərli: "Sarkozinin həbsindən də xəbərim var, məşhur fizikin ölümündən də"

Adətən müsahiblərlə söhbətimiz maksimum 7-8 sualdan ibarət olur. Ancaq bu söhbət, daha doğrusu həmsöhbət məni sözün əsl mənasında təəccübləndirdi. Çünki adətən sənətçilər barədə istər cəmiyyətdə, istər mediada fikirlər başqa cür olur. Əksəriyyəti yaşadığı ölkənin himninin sözlərinin müəllifini bilməkdə çətinlik çəkirlər. Ancaq bu dəfə...

Beləliklə, "Ölkə.Az"ın suallarını tanınmış müğənni, əməkdar artist Nüşabə Ələsgərli cavablandırır.

- Nüşabə xanım, yaradıcılığınızda hansı yeniliklər var?

- Novruz bayramı ərəfəsində çəkilişlərdə olduq. Bildiyiniz kimi, eyni zamanda Mədəniyyət və İncəsənət Universitetinin estrada kafedrasında dərs deyirəm. Həm universitet, həm çəkilişlər, axşamlar da toy məclisləri olur. Çox da olmasa, toylarımız var. Bu aralar səsyazma studiyasına getmək istəmədim. Çünki yorğunluqdan səs də yerində olmur. Ona görə də son üç ayda üç mahnı yazdıra bilmişəm. Biri Aysel Kərimlinin, ikisi Ruslan Səfəroğlunun bəstəsidir. Aysel Nəcəfzadə adlı şairə-bəstəkardan bir, Ruslan Səfəroğludan isə daha iki mahnı oxuyacağam.

- Neçə ildir universitetdə işləyirsiniz?

- Artıq yeddi ildir.

- Müsahibədən öncə bildirmişdiniz ki, bəzi tələbələrin orta təhsil səviyyəsi qənaətbəxş deyil.

- Auditoriyaya daxil olan tələbələrdən əvvəlcə xahişim, sonra tələbim bu olur ki, dörd il ərzində məktəbdə öyrəndiklərinizin üzərinə bir şey qoya bilməyəcəksinizsə, bura gəlməyin. Sözün açığı, əksər tələbələrin orta təhsil səviyyəsi yüksək olmur. Çünki bizdə əsas qabiliyyətdir, keçid balı digər ali məktəblərlə müqayisədə aşağıdır.

- Sizcə bu doğrudur?

- Biz hamıdan vunderkind olmağı tələb edə bilmərik. Arzu edərdim ki, orta məktəbi bitirib ali məktəbə daxil olan uşaqların biliyi bugünkündən yuxarı səviyyədə olsun. Elə uşaqlar olur ki, elementar, yaxud məntiq sualına cavab verə bilmir. Əslində, mən test üsulunun tərəfdarı deyiləm, dəstəkləmirəm.

- Dediniz ki, Nizami Gəncəvini tanımayan tələbələr var.

- Nizaminin adını eşidib, tanıyır. Soruşanda ki, Nizami Gəncəvi haralıdır, cavab verə bilmir. Bəlkə də sual tələbəni çaşdırır.

- Bəlkə bu da test üsulunun nəticəsidir?

- Ola bilər. Belə baxanda düz sual deyil, amma məntiq sualıdır. Bəlkə mən səni çaşdırmaq istəyirəm. Ancaq intellekti normal olan tələbələrimiz də var.

- Yəqin ki, tanınmış tələbələriniz də var.

- Mən universitetdə işə başlayanda Günay İbrahimli, Elvin Abdullayev orada oxuyurdular və dərsə gəlmirdilər. "Eurovision" təmsilçimiz Səmra Rəhimli də bizim fakültənin məzunudur. Gülyaz Məmmədovanın oğlu Ramazan, Nuray da yaxşı tələbələrimizdəndir.

- Efirdən Cənubi Azərbaycanda yaşayan qohumlarınıza salam göndərdiniz. Kökümüz, soyumuz bir olsa da, müəyyən ənənə fərqimiz var. Həyat yoldaşınızın ailəsi sizin ailə qurmağınıza qarşı çıxmadı ki?

- Onlar musiqini çox sevən insanlardır. Avropa ölkələrində, Amerikada yaşayan iranlılar da musiqini çox sevirlər.

- Son dəfə Təbrizdə nə vaxt olmusunuz?

- 2014-cü ildə.

- Bəs onlar?

- Onlar tez-tez gəlirlər. Anam, bacım vəfat etdiyinə görə gedə bilmədim.

- Övladlarınızdan danışaq. Hansı peşənin sahibidirlər?

- Övladlarımla bağlı suallara cavab vermirəm. Bircə onu deyə bilərəm ki, oğlum Orxan Azərbaycan Diplomatik Akademiyasında, qızım Nigar isə Azərbaycan Dillər Universitetində təhsil alır. Bacım Lətafət xanım İqtisad Universitetinin professorudur, böyük qardaşım yüksək vəzifələrdə çalışıb, kiçik qardaşım da İqtisad Universitetinin məzunudur. Rəhmətlik bacım Tibb Universitetini bitirib, mən Milli Konservatoriyanın məzunuyam. Anam müəllimə, atam həkim olub. Ailəmiz, nəslimiz ziyalıdır.

- Bu aralar sənətə aidiyyatı olan mahnıların qıtlığı var. Sanki hər kəs mahnı yazdıranda toyu düşünür. Əslində, səbəb məlumdur. Ancaq işin içində olan biri kimi deyəcəkləriniz maraqlıdır.

- Bu, iqtisadiyyatın mədəniyyət aləminə, incəsənət sahəsində çalışan insanlara təsirindən irəli gəlir. Ona görə də kommersiya xarakterli mahnılara üstünlük verilir. Aydın məsələdir ki, belə olan halda maddiyyat, kütlə və kütlənin zövqünə təsir edən mahnılar düşünülməlidir. Məqsəd həmin kütlənin rəğbətini qazanmaq, məclislərə gedərək pul qazanmaqdır.

- Demək istəyirsiniz ki, sanballı mahnılar xərclənilən pulu çıxartmır?

- Bəli, o mahnıları mədəniyyət xatirinə, gələcək naminə yazdırırıq. Əgər Nüşabə Ələsgərlidən bir mahnı qalsa, bəs edir. Baxın, Qədir Rüstəmov çox mahnı oxuyub, amma adı çəkiləndə ilk yada düşən "Sona bülbüllər" olur.

- Bəs sizin ən yaddaqalan mahnınız hansıdır?

- Müxtəlif versiyalar var. Amma ən çox "Ürəyimlə bacarmıram neyləyim" yadda qalıb.

- O mahnı da toya hesablanıb...

- İyirmi üç il əvvəl oxuyanda heç o haqda düşünməmişdim.

- Siz həmin mahnının ilk ifaçısısınız?

- Bəli, Vüsal Qurbanovun bəstəsidir. Mahnının aranjemanını bəstəkar Cavanşir Quliyev etmişdi. Cavanşir Quliyevdən mahnı almağa getmişdim, bu mahnını təqdim etdi. Oxudum və mahnı populyarlaşdı. Bu dərəcədə populyarlaşacağını gözləmirdim. Bu gün də gənc ifaçılar məclislərdə, toylarda bu mahnını oxuyurlar. Abbas Bağırov isə yeni aranjemanla mahnının efirlərdə də oxudu.

- İcazəsiz oxumuşdu?

- Xeyr, zəng etmişdi. Abbas çox qabiliyyətli oğlandır. Lalə Məmmədova mənim oxuduğum, Aygün Səmədzadənin bəstəsi olan "Bir sevgi" mahnısını oxudu. "Yanmış körpülər" serialının soundtrekini mən oxumuşam və orada əsas rollardan birini oynayırdım. Esmiraldanın Kənan M.M-in sözlərinə yazdığı həmin mahnı da yadda qaldı. Klipini də Kənan çəkmişdi.

- Bu gün həm də pedaqoq kimi fəaliyyət göstərirsiniz. Sirr deyilsə, nə qədər məvacib alırsınız?

- İki yüz on beş manat.

- Sizcə o məbləğ üçün 20-25 gün işləməyə dəyər? Yoxsa müəllimlik sizin hobbinizdir?

- İllərlə aldığım təhsil, çəkdiyim zəhmət hədər getməsin deyə, bildiklərimi gənc nəsilə çatdırmaq istəyirəm. Bəlkə də bu fikir pafoslu səslənəcək. Amma tam səmimi deyirəm ki, məvacib az olsa da, universitetə sevə-sevə gedirəm, tələbələrə vicdanla dərsimi keçirəm. Çünki toylara getməklə xərclərimi təmin edə biləcəyim qonorar əldə edirəm. Toylarsız çətin olardı.

- Söhbətimizin əvvəlində hiss etdim ki, bəzi orta məktəb müəllimlərinə qarşı aqressiyanız var.

- Bəli, bəzi tələbələrimə deyirəm ki, sizin tarix, ədəbiyyat müəllimlərinizi öldürərdim. Orta məktəbin tarix, ədəbiyyat, coğrafiya müəllimləri bildiklərini uşaqlara aşılamalıdırlar. Bu, kimya, biologiya, fiziki deyil ki. Uşaq məktəbdən kor çıxdısa, axıra qədər elə də gedəcək. Əgər bu peşəni seçmisinizsə, vicdanlı olun, yaxşı dərs keçin. Deyə bilərsiniz ki, Nüşabə xanım, ağzın isti yerdədir, toylara gedib pul qazanırsan, bizim maaşımız azdır. Sizinlə razıyam. Bu o demək deyil ki, siz pis dərs keçməlisiniz. Maaş azdırsa, ya çıx evdə otur, ya da dərsə gəlmisənsə, pulu unut, vicdanını ortaya qoy, dərsini keç. Nə edək, olan budur. Həmişə belə qalmayacaq ki. Yəqin ki, yaxşılığa doğru dəyişəcək.

- Mədəniyyət və İncəsənət Universitetində xeyli təcrübəli müəllim işdən azad olundu, yeni pedaqoqlar dəvət edildi...

- Şəxsən mən bunu müşahidə etməmişəm.

- Sizin çalışdığınız kafedranın rəhbəri kimdir?

- Kafedra müdiri Məryəm Babayeva, dekan Emin Sabitoğlunun qızı Ceyran Mahmudovadır.

- Fikir verirsinizsə, əhatənizdə Şəkidən olanlar çoxdur. Ceyran xanım dekan, Fərəh Əliyeva rektor, siz müəllimə...

- Amma kafedra müdirimiz Qubadandır (gülür). Fərəh xanım gələndən sonra kafedraları elmə, təhsilə yönəltdi.

- İşi yola verənlər olmur?

- Qətiyyən mümkün deyil.

- Keçmiş rektor Timuçin Əfəndiyevin dövründə işləmisiniz?

- Təxminən bir işləmişəm.

- Bir il rəhbəri tanımaq üçün yetərli müddətdir. Sizə görə Fərəh Əliyevanın rəhbərliyi altında çalışmaq daha rahatdır, yoxsa Timuçin Əfəndiyevin? Söhbət yaradılan şəraitdən gedir.

- Səmimiyyətimə inanın ki, rəhbərliyin kim olmasının fərqi olmayıb. Eyni şərait yaradılıb, eyni proqramla çalışırıq. Proqramı icra etmək borcumdur. Sadəcə, son zamanlar proqramlarımızı qəlizləşdiririk ki, tələbələrdə maraq yaransın. Mütəmadi olaraq sinif konsertləri, "açıq dərs"lər təşkil edirik.

- Son zamanlar tanınmış sənətçilərin bölgə teatrlarına, mədəniyyət evlərinə "marağı" yaranıb. Səbəb isə fəxri ad üçün təqdim olunmaqdır. Çünki nə dərəcədə populyar sənətçi olsa da, təqdimat rəsmi qurumlardan gedir. Sizin pedaqoji fəaliyyət istəyinə düşməyiniz də məhz bu istəkdən irəli gəlirmi? Amma səmimi cavablandırın.

- Əsla. Təəssüf edirəm ki, gec işlədim. Əslində, əmək kitabçam heç vaxt boş qalmayıb. Sumqayıtda orta ixtisas musiqi məktəbində, Dövlət Mahnı və Rəqs Ansamblında işləmişəm, on ilə yaxın AZTV-nin solisti olmuşam. Dünyanın otuz faizində konsertlərdə iştirak etmişəm. Bu sahədə işləməkdən zövq alıram.

- Hər sənətçinin populyarlığının pik dövrü olur. Siz həmin piki keçmisinizmi?

- Təsəvvür edin ki, gözəl qız uşağı böyüyür. Ərə gedir, yenə də gözəldir, ana olur, eynisidir.

- Yəni hər dövrün öz gözəlliyi var?

- Tamamilə doğrudur.

- On il əvvəl səsimə güvənib oxuyurdumsa, indi həm də təcrübəm var. Ona görə də pikdən endiyimi söyləyə bilmərəm.

- Bəs populyarlıq mənasında?

- Efirə az çıxa bilərəm, amma indi həm də öyrəndiklərimi öyrədirəm. Nəzərə alsaq ki, 2015-ci ildən 2017-ci ilin yayına qədər ümumiyyətlə efirə çıxmadım. Ancaq yenə də harasa çıxanda yaxınlaşıb şəkil çəkdirənlər, xoş söz deyənlər olurdu. Məclisə gedəndə əlli nəfər gəlib şəkil çəkdirirsə, deməli, insanların yadındayam. On il əvvəl də belə idi, indi də belədir.

- Söhbətimiz sizi yormur ki?

- Xeyr.

- Barənizdə deyilir ki, yetərincə diplomat xanımsınız. Doğrudan da siyasət sizə maraqlıdır, yoxsa belə alınır?

- Mən bunu etmək üçün çalışmıram, belə doğulmuşam. Həyatda maraqlandığım şeylər var. Saytdan şounu da, iqtisadiyyatı da, kriminalı da oxuyuram.

- Etiraf edim ki, məni təəccübləndirirsiniz.

- Prezident seçkisiylə maraqlanıram, aqrar sahəyə marağım var. Təzəlikcə okeanların dibində iki yeni axın tapılıb. Hətta qlobal istiləşmədən də sual verə bilərsiniz. Məşhur fizik Stiven Hokinqin vəfat etdiyindən, Fransanın keçmiş prezidenti Sarkozinin saxlanılıb, sonra sərbəst buraxılmağına qədər maraqlanıram.

- Maraqlandığınız mövzuları həmkarlarınızla paylaşırsınız?

- Ona vaxtım yoxdur.

- Bəs niyə efirdə bu cür bilgilərə sahib olduğunuzu görməmişik? Adətən, sizin şəxsi həyatınızla bağlı yazılır. Sizcə səbəb nədir?

- Siz soruşdunuz, mən də cavabladım. Amma mənə indi haqqında danışdığımız mövzuda sual verən olmayıb axı. Problem məndə yox, jurnalistlərdədir. Ona görə də bu müsahibədə şəxsi söhbətlər olmadı.

- Niyə sənət adamlarının qalmaqalları tez yayılır? Bəzən adi salam verməməyə görə narazılıqlar yaranır. Doğrudanmı, belə şeylər çox önəmlidir?

- Bir az dünyagörüşləri olsa, belə şeylərə fikir verməzlər. Mənə salam verməyən insana gələn dəfə mən də salam verməyib, üzümü çevirib gedəcəyəm. Bunu şişirtməyin nə mənası var? Qızıldan qiymətli vaxtımı başqa şeylərə sərf edərəm.

- Prodüseriniz var?

- Bəli, var.

- Məclis sahibləri özünüzlə danışa bilirlərmi?

- Birbaşa özüm cavab verirəm. Telefonda kiminsə danışığı xoşuma gəlməyəndə, onları köməkçiyə yönəldirəm. Çörək kəsdiyim, eyni məktəbdə oxuduğum, qonşu olduğum insanları prodüserə yönəltmirəm. Belə hərəkətə mədəniyyətsizlik kimi baxıram.

- Xeyriyyə məqsədilə toylara gedirsinizmi?

- Bəli, getmişəm və gedirəm də. Əvvəl lap çox idi, indi azaltmışam.

- Olubmu ki, toyuna pulsuz getdiyiniz adamın sonradan sizdən daha geniş imkanlara sahib olduğunu eşidəsiniz?

- Olub və sonra da əsəbləşmişəm. İnsan ən çox özünə əsəbləşir. Burada maddiyyatdan söhbət getmir.

- Sənət aləmindən rəfiqələriniz var?

- Universitetdəki müəllimlərlə rəfiqəlik edirik. Tanınmışlardan Gülüstan Əliyeva, Gülyaz-Gülyanaq bacıları, Manaf Ağayev, Nazpəri xanım, Brilyant xanımla, Kəmalə Vahabzadəylə, Könül Xasıyevayla, Vaqif Şıxəliyevlə dostluq, rəfiqəlik edirik.

- (zarafatyana) Bu çevrədə də xeyli şəkili var.

- Hər bölgədən dostlarım var (gülür).

- Sənət aləmində dərdinizi paylaşacağınız insan var?

- Var idi, indi yoxdur.