Jurnalist Əfqan Muxtarlı yenidən məhkəmə qarşısında
“Ölkə.Az”ın xəbərinə görə, hakim Rəfail Əliyevin sədrliyi ilə keçirilən məhkəmə prosesində zərərçəkmiş qismində Məmmədov Qafur Rüstəm oğlu tanınıb.
Növbəti proses aprel ayının 24-ə təyin edilib.
Xatırladaq ki, Balakən Rayon Məhkəməsində hakim Hümbət Səlimovun sədrliyi ilə keçirilən prosesdə jurnalist Əfqan Muxtarlı 6 il müddətinə azadlıqdan məhrum edilib.
Prokuror çıxışında Ə.Muxtarlının 8 il müddətinə azadlıqdan məhrum olunmasını istəyib. Əfqan Muxtarlı son sözündə bütün ittihamları rədd edib, həbsinin siyasi səbəblərlə və jurnalist fəaliyyəti ilə bağlı olduğunu bildirib. Həmçinin həbs olunacağı barədə məlumatlı olduğunu və bunu yazdığı 3 jurnalist araşdırması ilə bağlı olduğunu bilib.
Qeyd edək ki, Ə.Muxtarlı ötən il mayın 29-da saat 22.40 radələrində Balakən rayonu ərazisində Azərbaycan dövlət sərhədini qanunsuz keçdikdən sonra Dövlət Sərhəd Xidmətinin əməkdaşları tərəfindən saxlanılıb. Saxlanılarkən Ə.Muxtarlı xidmət əməkdaşlarına müqavimət göstərib. Ə.Muxtarlı inzibati qaydada tutularaq üzərində şəxsi axtarış keçirilib, ondan külli miqdarda nağd pul vəsaiti və digər əşyalar aşkarlanaraq götürülüb.
Ona Cinayət Məcəlləsinin 318-ci (Dövlət sərhədini qanunsuz olaraq keçmə), 206-cı (qaçaqmalçılıq) və 315-ci (Hakimiyyət nümayəndəsinə qarşı müqavimət göstərmə və ya zor tətbiq etmə) maddələri ilə ittiham irəli sürülüb.
Səbail Rayon Məhkəməsində Ə.Muxtarlı barəsində 3 aylıq həbs qətimkan tədbiri seçilib. Daha sonra həbs qətimkan tədbiri bir neçə dəfə uzadılıb.
