Oğurladığı əşyaları internet vasitəsi ilə satan şəxs hakim qarşısında

“Ölkə.Az”ın xəbərinə görə, oğurluq maddəsi ilə tutulan Elşad Nuru oğlu Qasımovun cinayət işinə Sabunçu Rayon Məhkəməsinin hakimi İlqar Abbasovun sədrliyi ilə baxılacaq. 

Xatırladaq ki, oğurluq ötən ilin dekabr ayında Sabunçu rayonunda yerləşən çay evlərindən birində qeydə alınıb.  Bu barədə Balaxanı qəsəbəsində yerləşən çay evlərindən birinin sahibi Əliheydər Mirzəbəyov Sabunçu Rayon Polis İdarəsi 12-ci Polis Bölməsinə xəbər verib. Şikayətçi gecə saatlarında çay evinin qapılarının qırıldığını və oradan 2 ədəd “Sony playstation” kompyuteri, 1 ədəd skripka çalğı aləti və 3 ədəd suvenir qəlyan dəstinin oğurlandığını bildirib.

12-ci Polis Bölməsi əməkdaşlarının isti izlərlə həyata keçirdikləri əməliyyat-axtarış tədbirləri nəticəsində qeyd edilən cinayəti törətməkdə şübhəli bilinən Sabunçu rayon sakini Elşad Qasımov tutulub. Saxlanılan şəxs ifadəsində oğurluq etdiyi çay evinin sahibini əvvəldən tanıdığını və gecə saatlarında orada heç kimin olmadığını bildiyi üçün oğurluq etdiyini bildirib.

Qeyd edək ki, E.Qasımov hadisədən sonra oğurladığı əşyaları satmaq üçün onların şəkilini çəkərək onlayn alış-veriş saytlarında yerləşdirib.